NH-61 టోల్ ప్లాజా అక్రమ వసూళ్లపై లోక్‌పాల్‌కు ఫిర్యాదు

నిర్మల్, అక్టోబర్ 9, 2026 (హైదరాబాద్ న్యూస్‌టైమ్): జాతీయ రహదారి 61 (NH-61) నిర్మల్ – భైంసా మార్గంలో నిబంధనలకు విరుద్ధంగా టోల్ ఫీజు వసూలు చేయడం, నాణ్యతా ప్రమాణాలు పాటించకపోవడంపై ఆమ్ ఆద్మీ పార్టీ (AAP) నిర్మల్ జిల్లా అధ్యక్షులు, తెలంగాణ రాష్ట్ర సంయుక్త కార్యదర్శి సయ్యద్ హైదర్ న్యూఢిల్లీలోని 'లోక్‌పాల్ ఆఫ్ ఇండియా'లో అధికారికంగా ఫిర్యాదు చేశారు. రోడ్డు పనులు పూర్తి కాకుండానే టోల్ వసూళ్లకు పాల్పడుతున్నారంటూ ఆయన ఈ ఫిర్యాదులో తీవ్ర ఆరోపణలు గుప్పించారు. జాతీయ రహదారి 61 లోని నిర్మల్ - భైంసా సెక్షన్‌లో రోడ్డు నిర్ణీత ప్రమాణాలకు అనుగుణంగా పూర్తి కాకుండానే టోల్ ప్లాజాను ఏర్పాటు చేసి ప్రజల నుంచి అక్రమంగా ఫీజు వసూలు చేస్తున్నారని ఆయన పేర్కొన్నారు. నేషనల్ హైవేస్ అథారిటీ ఆఫ్ ఇండియా (NHAI) ప్రాజెక్ట్ ఇంప్లిమెంటేషన్ యూనిట్ (PIU) ప్రాజెక్ట్ డైరెక్టర్, హైదరాబాద్ ప్రాంతీయ కార్యాలయ అధికారులు మరియు కేంద్ర రోడ్డు రవాణా శాఖ అధికారులతో కాంట్రాక్టర్ కుమ్మక్కై ప్రజాధనాన్ని దోచుకుంటున్నారని వివరించారు. దీనివల్ల కాంట్రాక్టర్‌కు భారీగా అనుచిత లాభం చేకూరుతుండగా, ప్రజలకు మాత్రం తీరని నష్టం జరుగుతోందని ఆవేదన వ్యక్తం చేశారు. నాణ్యతా ప్రమాణాలు పాటించకుండా రోడ్డును నిర్మించడం మరియు సరైన నిర్వహణ లేకపోవడం వల్ల ఈ మార్గంలో వరుసగా ఘోర రోడ్డు ప్రమాదాలు జరిగి అనేకమంది ప్రాణాలు కోల్పోతున్నారని ఆయన ఆందోళన వ్యక్తం చేశారు. ఈ అవకతవకలపై లోక్‌పాల్ అండ్ లోకాయుక్త చట్టం-2013 లోని సెక్షన్ 14, 20 ప్రకారం సమగ్ర ప్రాథమిక విచారణ జరిపించాలని, అవినీతి నిరోధక చట్టం (Prevention of Corruption Act, 1988) కింద సంబంధిత అధికారులపై మరియు కాంట్రాక్టర్‌పై కఠిన చర్యలు తీసుకోవాలని లోక్‌పాల్‌ను కోరినట్లు సయ్యద్ హైదర్ తెలిపారు. ప్రజాధనాన్ని కొల్లగొడుతూ, ప్రయాణికుల ప్రాణాలతో చెలగాటమాడుతున్న బాధ్యులపై చర్యలు తీసుకునే వరకు తమ న్యాయపోరాటం కొనసాగుతుందని ఆయన స్పష్టం చేశారు.