చౌటుప్పల్, యాదాద్రి భువనగిరి, అక్టోబర్ 8, 2026 (హైదరాబాద్ న్యూస్‌టైమ్): మాజీ విద్యార్థి నాయకుడు, తెలంగాణ ఉద్యమకారుడు మరియు అడ్వకేట్ కట్టెల లింగస్వామి రచించిన విప్లవాత్మక పుస్తకం 'కలం కవాతు' ఆవిష్కరణ కార్యక్రమం అత్యంత వైభవంగా జరిగింది. పాత నవోదయ సినిమా హాల్‌లోని బి.ఆర్.కె. కన్వెన్షన్ హాల్‌లో నిర్వహించిన ఈ వేడుకకు సాహిత్య, రాజకీయ, విద్యార్థి సంఘాల ప్రముఖులు పెద్ద సంఖ్యలో హాజరయ్యారు.
తెలంగాణ ఉద్యమకారుడు ఉప్పు కృష్ణ అధ్యక్షతన జరిగిన ఈ సభకు ఉస్మానియా ఆర్ట్స్ కళాశాల ప్రిన్సిపల్, ప్రముఖ రచయిత, కవి ప్రొఫెసర్ కాసిం, ఎమ్మెల్సీ నెల్లికంటి సత్యం, ప్రజానాట్యమండలి రాష్ట్ర అధ్యక్షుడు కె. శ్రీనివాసు ముఖ్య అతిథులుగా విచ్చేశారు. ఈ సందర్భంగా వారు పుస్తకాన్ని ఆవిష్కరించి, రచయిత కట్టెల లింగస్వామిని ఘనంగా సన్మానించారు.
సమాజంలోని అనేక అంశాలను అక్షరబద్ధం చేయడం అభినందనీయం: ప్రొఫెసర్ కాసిం ఈ కార్యక్రమంలో ప్రొఫెసర్ కాసిం మాట్లాడుతూ.. సమాజంలో జరుగుతున్న, జరిగిన అనేక కీలక విషయాలను అద్భుతమైన అంశాలతో అక్షరాలను ఒకచోట చేర్చి అరుదైన పుస్తకంగా తీసుకువచ్చిన కట్టెల లింగస్వామిని అభినందించారు. సంస్థాన్ నారాయణపురం, చౌటుప్పల్ ప్రాంతం గొప్ప పోరాట నేపథ్యం కలిగి ఉందని, తెలంగాణ ఉద్యమంలో ప్రముఖ పాత్ర పోషించిన ఈ ప్రాంతం నేడు సాహిత్యంలోనూ తన ముద్ర వేయడం గర్వకారణమన్నారు. కవి తన సొంత బతుకును ఆవిష్కరించడంతో పాటు ప్రజల కష్టాలను, జీవన విధానాన్ని ఈ పుస్తకంలో ప్రతిబింబింపజేసిన ప్రయత్నం ఎంతో గొప్పదని కొనియాడారు. విద్యార్థిగా, అధ్యాపకుడిగా, రచయితగా ఆయన ప్రయాణం మరింత ముందుకు సాగాలని ఆకాంక్షించారు.
యువతను చైతన్యం చేసేలా పుస్తక రచన ఉండాలి: ఎమ్మెల్సీ నెల్లికంటి సత్యం ఎమ్మెల్సీ నెల్లికంటి సత్యం మాట్లాడుతూ.. స్థానికంగా నెలకొన్న నిరుద్యోగం, పర్యావరణ కాలుష్యం వంటి సమస్యలపై విద్యార్థులు, యువత స్పందించేలా, చైతన్యవంతులయ్యేలా ఇలాంటి పుస్తకాల రచన రావాలని పిలుపునిచ్చారు. ఏఐఎస్‌ఎఫ్ (AISF) విద్యార్థి నాయకుడిగా పనిచేస్తూ, అధ్యాపకుడిగా సేవలందిస్తూ ఒక చక్కటి పుస్తకాన్ని ముందుకు తీసుకురావడం హర్షించదగిన విషయమన్నారు. దేశంలో జరుగుతున్న అనేక ప్రజా ఉద్యమాలకు ఇలాంటి సాహిత్య రచనలు అండగా నిలుస్తాయని పేర్కొన్నారు.
ఈ కార్యక్రమంలో వివిధ సంఘాల ప్రతినిధులు మరియు నాయకులు బచ్చనగోని గాలయ్య, జిల్లా యాదయ్య, బోరం ప్రకాష్ రెడ్డి, తాడూరి పరమేష్, బాతరాజు సత్యం, బోయ రామచంద్రం, లింగస్వామి, మల్లేష్, చిలక రాజు, సంజీవ, కొండూరు వెంకటేశం, తిగుళ్ల శ్రీనివాస్, కార్తీక్ గౌడ్, చింతల సాయిలు, ఎం.డి. ఖయ్యూం, తడక మోహన్, కాకి సుందర్ తదితరులు పాల్గొన్నారు. అలాగే వివిధ కళాశాలల ప్రతినిధులు విష్ణుకుమార్, మహేందర్ రెడ్డి, శ్రీనివాస్, శేఖర్ రెడ్డితో పాటు పెద్ద సంఖ్యలో విద్యార్థిని విద్యార్థులు, వివిధ సంఘాల నాయకులు, కార్యకర్తలు హాజరై రచయితను అభినందించారు.