హైదరాబాద్, జూలై 04, 2026 (హైదరాబాద్ న్యూస్‌టైమ్): అమెరికాలోని వైద్య వ్యవస్థపై ఒక అమెరికన్ మహిళ చేసిన వ్యాఖ్యలు ఇప్పుడు సోషల్ మీడియాలో తీవ్ర చర్చకు దారితీస్తున్నాయి. "అమెరికాలో మమ్మల్ని దోచుకుంటున్నారు.. ఇండియాలో వైద్యం ఎంత చౌకగా దొరుకుతుందో తెలిస్తే షాక్ అవుతారు" అంటూ ఆమె చేసిన ఆరోపణలు వైరల్‌గా మారాయి.
అసలేం జరిగింది? 'లిజ్' అనే అమెరికన్ మహిళ తన ఇన్‌స్టాగ్రామ్‌లో "ఇండియన్ వర్సెస్ అమెరికన్ హెల్త్‌కేర్" పేరుతో ఒక వీడియోను పోస్ట్ చేసింది. తన అత్తగారికి వచ్చిన ఒక రకమైన బ్లడ్ క్యాన్సర్‌ కోసం వాడే 'రెవ్లిమిడ్' (Revlimid) అనే మందు ధరల మధ్య ఉన్న భారీ వ్యత్యాసాన్ని ఆమె బయటపెట్టింది.
- అమెరికాలో: ఒకే ఒక్క మాత్ర ధర ఏకంగా $900 అంటే మన కరెన్సీలో సుమారు రూ. 85,000.
- భారతదేశంలో: అదే మందు (జెనెరిక్ వెర్షన్) ధర కేవలం 30 సెంట్లు నుంచి 3 డాలర్ల వరకు.. అంటే భారత కరెన్సీలో సుమారు రూ. 35 నుండి రూ. 300 లోపే!
"మేము దోపిడీకి గురవుతున్నాం" ఈ వ్యత్యాసాన్ని చూసి ఆశ్చర్యపోయిన లిజ్, "భారతదేశంలో అత్యంత చౌకగా మందులు లభిస్తున్నాయి. కానీ అమెరికాలో సామాన్య ప్రజలను వైద్య వ్యవస్థ పేరిట దోచుకుంటున్నారు. అమెరికాలో హెల్త్‌కేర్ ఒక పెద్ద స్కామ్" అంటూ ఆగ్రహం వ్యక్తం చేసింది. ఇలాంటి మందుల కోసం అమెరికన్లు ఇండియాకు వచ్చి కొనుక్కోవడమే మేలని, విమాన ఖర్చులు పోను కూడా వారికి డబ్బులు మిగులుతాయని నెటిజన్లు కామెంట్ చేస్తున్నారు.
ఒక్క లిజ్ మాత్రమే కాదు.. లిజ్ ఒక్కతే కాదు, గత నెలలో విక్టోరియా అనే మరో అమెరికన్ మహిళ కూడా ఇలాంటి ఆరోపణలే చేసింది. ఇన్సూరెన్స్ కంపెనీలు కవర్ చేయని మందుల కోసం అమెరికాలో $1,000 (రూ. 90,000 పైనే) చెల్లించాల్సి రాగా, అదే మందును ఇండియా నుంచి కేవలం $25 (రూ. 2,200) కి తెప్పించుకున్నానని ఆమె వెల్లడించింది.
ప్రస్తుతం ఈ వీడియోలు అమెరికాలో వైద్య ఖర్చులు ఎంత భారం అవుతున్నాయో తెలియజేస్తూ, ప్రపంచవ్యాప్తంగా సామాన్యుల దృష్టిని ఆకర్షిస్తున్నాయి.