హైదరాబాద్, జూన్ 26 (హైదరాబాద్ న్యూస్‌టైమ్): కొరియా ద్వీపకల్పంలో యుద్ధ మేఘాలు కమ్ముకుంటున్నాయి. దక్షిణ కొరియా సరిహద్దులను లక్ష్యంగా చేసుకుని ఉత్తర కొరియా అధినేత కిమ్ జోంగ్ ఉన్ గురువారం అత్యంత విధ్వంసకర ఆయుధాల పరీక్షలను స్వయంగా పర్యవేక్షించారు. శత్రువులకు ఎప్పటికీ నిద్ర లేకుండా చేయడమే మన లక్ష్యమంటూ కిమ్ సైన్యానికి పిలుపునిచ్చారు. ఈ పరిణామాలపై తీవ్రంగా స్పందించిన దక్షిణ కొరియా.. ఉత్తర కొరియాకు బుద్ధి చెప్పేందుకు ఏకంగా 5 లక్షల మందితో కూడిన భారీ ‘డ్రోన్ వారియర్స్’ (Drone Warriors) సైన్యాన్ని రంగంలోకి దించుతున్నట్లు శుక్రవారం సంచలన ప్రకటన చేసింది.
మొత్తం దక్షిణ కొరియానే టార్గెట్ చేసిన కిమ్: ఉత్తర కొరియా అధికారిక వార్తా సంస్థ KCNA ప్రకారం.. శత్రువుల ఎయిర్‌పోర్టులు, నౌకాశ్రయాలు, విద్యుత్ కేంద్రాలను క్షణాల్లో బూడిద చేయగల సరికొత్త ‘స్పెషల్ మిషన్’ బాలిస్టిక్ మిసైల్ వార్‌హెడ్‌ను, సుదూర లక్ష్యాలను ఛేదించే అప్‌గ్రేడెడ్ రాకెట్ లాంచర్లను ఉత్తర కొరియా విజయవంతంగా పరీక్షించింది. ఈ ఆయుధాల రేంజ్ పెంచడం ద్వారా దక్షిణ కొరియాలోని అమెరికా సైనిక స్థావరాలతో పాటు దేశం మొత్తాన్ని తమ క్షిపణి పరిధిలోకి తెచ్చుకున్నట్లు విశ్లేషకులు చెప్తున్నారు. అంతేకాకుండా తమ నౌకాదళానికి కూడా అణ్వాయుధాలను (Nuclear Weapons) అనుసంధానిస్తున్నట్లు కిమ్ ప్రకటించారు.
డ్రోన్లనే తుపాకులుగా వాడనున్న దక్షిణ కొరియా: కిమ్ దుశ్చర్యలకు అడ్డుకట్ట వేసేందుకు దక్షిణ కొరియా రక్షణ మంత్రి అన్ గ్యు-బాక్ సరికొత్త వ్యూహాన్ని ప్రకటించారు. సైనికులు తమ వ్యక్తిగత తుపాకులను ఎలా వాడతారో.. అదే స్థాయిలో డ్రోన్లను ఆపరేట్ చేసేలా ఏకంగా 5 లక్షల మంది ‘డ్రోన్ వారియర్స్’కు అత్యున్నత శిక్షణ ఇవ్వనున్నట్లు వెల్లడించారు. ఉత్తర కొరియాకు రష్యా నుండి అందుతున్న సాంకేతిక సహకారాన్ని తిప్పికొట్టడమే దీని లక్ష్యమన్నారు. మరోవైపు దక్షిణ కొరియా అధ్యక్షుడు లీ జే మ్యుంగ్ 2030 నాటికి 650 మిలియన్ డాలర్ల విలువైన భారీ రక్షణ సంస్థలను స్థాపించనున్నట్లు ప్రకటించగా, అమెరికా అధ్యక్షుడు డొనాల్డ్ ట్రంప్ కూడా ఉత్తర కొరియా దూకుడుపై దృష్టి పెట్టే సమయం ఆసన్నమైందని స్పష్టం చేశారు.