ఆడబిడ్డల వివాహానికి ఆర్థిక భరోసా.. లబ్ధిదారులకు కల్యాణ లక్ష్మి చెక్కుల పంపిణీ

సంస్థాన్ నారాయణపురం, సెప్టెంబర్ 28, 2026 (హైదరాబాద్ న్యూస్‌టైమ్): పేద కుటుంబాల ఆడపిల్లల వివాహాలకు రాష్ట్ర ప్రభుత్వం అందిస్తున్న 'కల్యాణ లక్ష్మి' పథకం అండగా నిలుస్తోందని మండల తహసీల్దార్ (ఎమ్మార్వో) శ్రీనివాస్ రెడ్డి పేర్కొన్నారు. సంస్థాన్ నారాయణపురం మండల పరిధిలోని మల్లారెడ్డిగూడెం గ్రామానికి చెందిన లబ్ధిదారు నూతనకంటి రాజేశ్వరికి మంజూరైన కల్యాణ లక్ష్మి చెక్కును తహసీల్దార్ శ్రీనివాస్ రెడ్డి, మల్లారెడ్డిగూడెం గ్రామ సర్పంచ్ అన్నం మల్లేష్ చేతుల మీదుగా అందజేశారు. ఈ సందర్భంగా వారు మాట్లాడుతూ.. నిరుపేద కుటుంబాలకు ఆర్థిక భరోసా కల్పించాలనే సదుద్దేశంతో ప్రభుత్వం ఈ సంక్షేమ పథకాన్ని విజయవంతంగా అమలు చేస్తోందని తెలిపారు. ప్రభుత్వ సంక్షేమ పథకాలను అర్హులైన ప్రతి ఒక్కరూ సద్వినియోగం చేసుకోవాలని సూచించారు. కల్యాణ లక్ష్మి చెక్కు అందుకున్న లబ్ధిదారు నూతనకంటి రాజేశ్వరి మాట్లాడుతూ.. తమ కుటుంబానికి ఆర్థిక సహాయం అందించిన ముఖ్యమంత్రి ఎనుముల రేవంత్ రెడ్డికి, మునుగోడు ఎమ్మెల్యే కోమటిరెడ్డి రాజగోపాల్ రెడ్డికి మరియు గ్రామ సర్పంచ్ అన్నం మల్లేష్‌కి ప్రత్యేక కృతజ్ఞతలు తెలిపారు. ఈ కార్యక్రమంలో గ్రామ పాలకవర్గ సభ్యులు, స్థానిక ప్రజలు తదితరులు పాల్గొన్నారు.