ఆస్తి పంచుకుని తల్లిదండ్రులను రోడ్డున పడేసిన కొడుకులు దిక్కులేక బావిలో దూకి వృద్ధ దంపతుల ఆత్మహత్య

సంగారెడ్డి, అక్టోబర్ 1, 2026 (హైదరాబాద్ న్యూస్‌టైమ్): కని,పెంచి ప్రయోజకులను చేసిన కన్నవారికే కన్నీరు మిగిల్చిన అంతులేని విషాద ఘటన సంగారెడ్డి జిల్లాలో చోటుచేసుకుంది. తమకున్న యాభై ఎకరాల భూమిలో ఇరవై ఐదు ఎకరాలను ముగ్గురు కొడుకులకు పంచిన వృద్ధ దంపతులను వారు గాలికి వదిలేశారు. తిండి కూడా పెట్టకుండా కనీస ఆదరణ కరువైన వైనం, అధికారుల నిర్లక్ష్యం ఆ వృద్ధ దంపతులను చావుబాట పట్టించింది. చివరికి దిక్కుతోచని స్థితిలో వారు వ్యవసాయ బావిలో దూకి ఆత్మహత్య చేసుకున్నారు. సంగారెడ్డి జిల్లా నారాయణఖేడ్ మండలం చాప్తా (కె) గ్రామానికి చెందిన ముంగే నర్సారెడ్డి (88), అంజమ్మ (85) దంపతులకు ముగ్గురు కొడుకులు సిద్ధారెడ్డి, కృష్ణారెడ్డి, సంగారెడ్డి ఉన్నారు. తమ వద్ద ఉన్న మొత్తం భూమిలో ఇరవై ఐదు ఎకరాలను, ఇంటిని ముగ్గురు కొడుకులకు సమానంగా పంచారు. అయితే ఆస్తి రాసిచ్చిన రోజు నుంచి ఆ కొడుకులు కన్నతల్లిదండ్రులను పట్టించుకోకుండా గాలికి వదిలేశారు.

భూ పంపకాల తర్వాత వృద్ధ దంపతులు తీవ్ర దుర్భర జీవితాన్ని అనుభవించారు. వంట చేసుకునే శక్తి కూడా లేని వయసులో, అంజమ్మ ఆరోగ్యం పూర్తిగా క్షీణించింది. కనీసం అన్నం పెట్టే నాథుడు లేకపోవడంతో ఆ వృద్ధురాలు స్థానిక ప్రభుత్వ పాఠశాలకు వెళ్లి అక్కడ వండే మధ్యాహ్న భోజనాన్ని తింటూ కొన్నాళ్లు కడుపు నింపుకున్నారు. తమకు బతుకుదెరువు కోసం పంచిన ఆస్తిలోంచి కనీసం ఒక్కటో, రెండెకరాల భూమిని తిరిగి తమ పేరున ఇప్పించాలని వారు గత రెండు మూడు సంవత్సరాలుగా పోలీసులను, స్థానిక అధికారులను ఎంతో వేడుకున్నారు. కానీ ఎవరూ వారి గోడును పట్టించుకోలేదు. తినడానికి తిండి కూడా దొరకని దయనీయ స్థితి, కొడుకుల అక్రూర వైఖరి, అధికారుల ఉదాసీనతతో తీవ్ర మనస్తాపానికి గురైన ఆ వృద్ధ దంపతులు ఆత్మహత్యే శరణ్యంగా భావించారు. ఎవరికీ భారంగా బతకలేమంటూ గ్రామంలోని వ్యవసాయ బావిలో దూకి బలవన్మరణం చెందారు. మృతుల మనవడు తిరుపతిరెడ్డి ఇచ్చిన ఫిర్యాదు మేరకు పోలీసులు కేసు నమోదు చేసి దర్యాప్తు చేస్తున్నారు. కన్నవారిని కంటికి రెప్పలా చూసుకోవాల్సిన కొడుకులు కఠినంగా వ్యవహరించడం, అధికారుల అలసత్వం వల్లనే ఈ దారుణం జరిగిందంటూ గ్రామస్తులు కన్నీరుమున్నీరవుతున్నారు.