ఇన్‌స్టాగ్రామ్‌ పరిచయం హోటల్ రూమ్‌లో హత్య!

హైదరాబాద్, అక్టోబర్ 3, 2026 (హైదరాబాద్ న్యూస్‌టైమ్): సామాజిక మాధ్యమాల ద్వారా ఏర్పడిన పరిచయం ఒక యువతి ప్రాణాలను బలిగొంది. ఇన్‌స్టాగ్రామ్‌లో పరిచయమైన వ్యక్తి మోసపూరిత మాటలతో నమ్మించి, హోటల్ గదికి రప్పించి పీజీ విద్యార్థినిని అత్యంత దారుణంగా హతమార్చిన ఘటన మియాపూర్ పోలీసు స్టేషన్ పరిధిలో వెలుగు చూసింది. హన్మకొండలో పీడియాట్రిక్స్ (పీజీ) మొదటి సంవత్సరం అభ్యసిస్తున్న సంగారెడ్డి జిల్లాకు చెందిన కె. సృజన (27) హత్యకు గురయ్యారు. ఏడేళ్ల క్రితం సోషల్ మీడియా ప్లాట్‌ఫాం అయిన ఇన్‌స్టాగ్రామ్ ద్వారా సృజనకు రవికుమార్ అనే వ్యక్తితో పరిచయం ఏర్పడింది. ఈ పరిచయం క్రమేణా కొనసాగుతున్న తరుణంలో, కొంతకాలం క్రితం రవికుమార్ సృజన వద్ద నుండి ఒక బంగారు గొలుసు తీసుకున్నాడు. అయితే ఆ గొలుసును తిరిగి ఇవ్వాలని సృజన కోరడంతో, రవికుమార్ ఒక పక్కా పథకం పన్నాడు. ఈ నెల 29వ తేదీన హైదరాబాద్‌లోని మియాపూర్‌లో ఓ హోటల్‌లో గదిని అద్దెకు తీసుకున్నాడు. అనంతరం సృజన్‌కు ఫోన్ చేసి "నీ బంగారు గొలుసు తిరిగి ఇస్తాను, ఇక్కడికి రా" అని నమ్మించి పిలిచాడు. ఆ మాటలు నమ్మి సృజన ఈ నెల 30వ తేదీన రవికుమార్ వద్దకు వెళ్లింది. అయితే రెండు రోజులు గడిచినా సృజన తిరిగి రాకపోగా, ఆమె మొబైల్ ఫోన్ స్విచ్ ఆఫ్ రావడంతో అనుమానం వచ్చిన ఆమె స్నేహితురాళ్లు ఈ విషయాన్ని సృజన తండ్రికి తెలిపారు. కూతురు ఆచూకీ తెలియకపోవడంతో తండ్రి వెంటనే పోలీసులకు ఫిర్యాదు చేశారు. రంగంలోకి దిగిన పోలీసులు బాధితురాలి సెల్‌ఫోన్ లొకేషన్ ఆధారంగా మియాపూర్‌లోని సంబంధిత హోటల్‌‌ను గుర్తించారు. అక్కడ హోటల్ గది తలుపులు తెరిచి చూడగా, సృజన విగతజీవిగా మంచంపై పడిఉంది. నిందితుడు రవికుమార్ ముందే వేసుకున్న ప్లాన్ ప్రకారమే హోటల్‌కు పిలిపించి, గదిలో దిండుతో ముఖంపై గట్టిగా అణచి ఊపిరాడకుండా చేసి అత్యంత కిరాతకంగా హతమార్చినట్లు పోలీసుల ప్రాథమిక విచారణలో తేలింది. సృజన తండ్రి ఫిర్యాదు మేరకు మియాపూర్ పోలీసులు కేసు నమోదు చేసి, ఘటన జరిగినప్పటి నుండి పరారీలో ఉన్న నిందితుడు రవికుమార్ కోసం ప్రత్యేక బృందాలతో గాలింపు చర్యలు ముమ్మరం చేశారు.