ఇష్టానుసారం యాంటీబయాటిక్స్ వాడితే కుదరదు.. కేంద్రం కొత్త ప్రతిపాదన!

న్యూఢిల్లీ, ఆగస్ట్ 4, 2026 (హైదరాబాద్ న్యూస్‌టైమ్): యాంటీ మైక్రోబయల్ మందుల (Antimicrobial medicines) దుర్వినియోగాన్ని అరికట్టేందుకు, వాటి వాడకంలో ప్రజలకు అవగాహన కల్పించేందుకు కేంద్ర ప్రభుత్వం ఒక కీలక నిర్ణయం తీసుకుంది. అన్ని రకాల యాంటీ మైక్రోబయల్ మందుల ప్యాకింగ్‌పై తప్పనిసరిగా 'బ్లూ-స్ట్రిప్' (నీలి రంగు గీత) లేబుల్స్‌ను ముద్రించాలని ప్రతిపాదించింది. దీనివల్ల ఫార్మసీ కౌంటర్లలో రోగులు ఆ మందులను సులభంగా గుర్తించి, వైద్యుల సూచన మేరకు బాధ్యతాయుతంగా వాడేందుకు వీలవుతుందని ప్రభుత్వం పేర్కొంది. మంగళవారం రాజ్యసభలో ఒక ప్రశ్నకు లిఖితపూర్వక సమాధానం ఇచ్చిన కేంద్ర ఆరోగ్య శాఖ రాష్ట్ర మంత్రి ప్రతాప్‌రావు జాధవ్ ఈ వివరాలను వెల్లడించారు. దేశంలో అంతకంతకూ పెరుగుతున్న యాంటీ మైక్రోబయల్ రెసిస్టెన్స్ (AMR) ముప్పును ఎదుర్కొనేందుకు ప్రభుత్వం వివిధ రంగాలలో సమన్వయంతో కూడిన కఠిన చర్యలు చేపడుతున్నట్లు ఆయన తెలిపారు.

• ప్రభుత్వ తీసుకుంటున్న ఇతర చర్యలు:
• నేషనల్ యాక్షన్ ప్లాన్ (NAP-AMR 2.0): ఈ రెండో విడత కార్యాచరణ ప్రణాళిక కింద మానవ, జంతు, ఆహార మరియు పర్యావరణ రంగాలలో యాంటీ మైక్రోబయల్ రెసిస్టెన్స్, యాంటీ మైక్రోబయల్ వినియోగంపై నిఘా వ్యవస్థలను మరింత పటిష్టం చేసినట్లు మంత్రి తెలిపారు.
• దుర్వినియోగానికి చెక్: యాంటీబయాటిక్స్‌ను ఇష్టానుసారం వాడటం వల్ల భవిష్యత్తులో మొండి వ్యాధులు వచ్చే ప్రమాదం ఉందని, దీన్ని నివారించేందుకే ఈ బ్లూ-స్ట్రిప్ లేబులింగ్ విధానాన్ని తెస్తున్నట్లు నిపుణులు పేర్కొంటున్నారు.