హైదరాబాద్, జూన్ 29 (హైదరాబాద్ న్యూస్‌టైమ్): నగరంలో ఎస్‌ఐఆర్ (SIR) జాబితా భయం ఒక ప్రాణాన్ని బలితీసుకుంది. జాబితాలో తన పేరు లేదని, అధికారులు తనను జైలుకు పంపుతారనే తీవ్ర భయాందోళనతో ఒక కారు డ్రైవర్ ఉరేసుకుని ఆత్మహత్యకు పాల్పడిన ఘోర ఘటన హైదరాబాద్‌లోని బోరబండ భరత్‌నగర్‌లో వెలుగుచూసింది. మృతుడిని స్థానికంగా నివసించే షేక్ ముజీబుర్ రహ్మాన్ (51)గా పోలీసులు గుర్తించారు.
భార్య నచ్చజెప్పినా వినకుండా: పోలీసుల కథనం ప్రకారం.. గత కొన్ని రోజులుగా ఎస్‌ఐఆర్ (SIR) లిస్టులో తన పేరు లేకపోవడంపై ముజీబుర్ రహ్మాన్ తీవ్ర మనస్తాపానికి, మానసిక ఒత్తిడికి గురయ్యాడు. జాబితాలో పేరు లేనందుకు అధికారులు తనను జైలుకు పంపిస్తారేమోనని, ఒకవేళ తను జైలుకు వెళ్తే తన ముగ్గురు పిల్లల భవిష్యత్తు ఏమౌతుందని, వారిని ఎవరు చూసుకుంటారంటూ భార్య వద్ద పలుమార్లు తీవ్ర ఆవేదన వ్యక్తం చేశాడు. భర్త ఆందోళనను చూసి భార్య ఎంత నచ్చజెప్పే ప్రయత్నం చేసినప్పటికీ, అతనిలో భయం ఏమాత్రం తగ్గలేదు. ఈ క్రమంలోనే తీవ్ర మనస్తాపానికి లోనైన ముజీబుర్ రహ్మాన్.. రాత్రి సమయంలో ఇంటి బయట ఉన్న షెడ్డు ఇనుప రాడ్‌కు ఉరేసుకుని బలవన్మరణానికి పాల్పడ్డాడు. ఉదయాన్నే మృతదేహాన్ని చూసిన కుటుంబ సభ్యులు కన్నీరుమున్నీరుగా విలపిస్తున్నారు. స్థానికుల సమాచారంతో ఘటనా స్థలానికి చేరుకున్న పోలీసులు కేసు నమోదు చేసుకుని మృతదేహాన్ని పోస్ట్‌మార్టం నిమిత్తం ఆసుపత్రికి తరలించారు.