కమ్యూనిటీ స్థలం కబ్జా ఆరోపణల్లో ఎలాంటి వాస్తవం లేదు

చౌటుప్పల్, యాదాద్రి భువనగిరి, అక్టోబర్ 10, 2026 (హైదరాబాద్ న్యూస్‌టైమ్): చౌటుప్పల్ మున్సిపాలిటీ కేంద్రంలోని 12వ వార్డు కంచరకుంట్ల కాలనీలో కమ్యూనిటీ స్థలాన్ని తాము కబ్జా చేశామంటూ వస్తున్న ఆరోపణలను కంచరకుంట్ల వెంకటరెడ్డి, కంచరకుంట్ల రాంరెడ్డి తీవ్రంగా ఖండించారు. కొందరు తమ స్వార్థం కోసం కాలనీవాసులను రెచ్చగొడుతూ తమపై బురదజల్లుతున్నారని, ఎలాంటి ఆధారాలు లేకుండా తప్పుడు ప్రచారం చేస్తున్నారని వారు పత్రికా ప్రకటనలో స్పష్టం చేశారు. గతంలో కంచరకుంట్ల శేఖర్ రెడ్డి తండ్రి కంచరకుంట్ల సత్తిరెడ్డి 12వ వార్డులో ప్లాట్లను విక్రయించే సమయంలో కమ్యూనిటీ హాల్ కోసం స్థలం కేటాయిస్తామని చెప్పి, తమ సొంత భూమిని చూపించి ప్లాట్లు అమ్మానంటూ బూటకపు ప్రచారం చేస్తున్నారని ఆరోపించారు. వాస్తవానికి ఆ స్థలం తమ పూర్వీకుల ద్వారా వారసత్వంగా సంక్రమించిందని స్పష్టం చేశారు. తమపై ఆరోపణలు చేస్తున్న వ్యక్తులే ముందుగా ఆ కమ్యూనిటీ స్థలానికి సంబంధించిన రిజిస్ట్రేషన్ డాక్యుమెంట్లు, విక్రయ పత్రాలను కాలనీవాసులకు చూపించాలని సవాల్ విసిరారు. గత తొమ్మిదేళ్లుగా కాలనీవాసులకు ఎలాంటి డాక్యుమెంట్లు చూపించని వారు, ఇప్పుడు నకిలీ డాక్యుమెంట్లు సృష్టించి తమపై నిందలు మోపుతున్నారని మండిపడ్డారు. ఈ విషయంపై ఇప్పటికే చౌటుప్పల్ ఆర్డీవో, మున్సిపల్ కమిషనర్‌కు ఫిర్యాదు చేసినట్లు తెలిపారు. తప్పుడు సర్వే నెంబర్లతో అక్రమంగా ప్లాట్లు అమ్మిన వారి వివరాలన్నీ తమ దగ్గర పక్కా ఆధారాలుగా ఉన్నాయని చెప్పారు. ఆధారాలు లేకుండా తమపై నిరాధార ఆరోపణలు చేస్తూ పరువు నష్టం కలిగించేలా వ్యవహరిస్తే చట్టరీత్యా కఠిన చర్యలు తీసుకుంటామని హెచ్చరించారు. తమ వద్ద ఉన్న చట్టపరమైన అన్ని డాక్యుమెంట్లను అధికారులు, కాలనీవాసుల ముందు ఉంచడానికి సిద్ధంగా ఉన్నామని, కాలనీవాసులు వాస్తవాలను గుర్తించాలని వారు విజ్ఞప్తి చేశారు.