కేటీఆర్ పాస్‌పోర్ట్ సీజ్ వార్తలు అవాస్తవం

హైదరాబాద్, సెప్టెంబర్ 29, 2026 (హైదరాబాద్ న్యూస్‌టైమ్): భారాస కార్యనిర్వాహక అధ్యక్షుడు కేటీఆర్ పాస్‌పోర్ట్‌ను సీజ్ చేశారంటూ మీడియాలో వస్తున్న వార్తలన్నీ పూర్తిగా అవాస్తవమని ఆయన తరఫు న్యాయవాది జక్కుల లక్ష్మణ్ స్పష్టం చేశారు. ఏసీబీ అధికారులు కేవలం పాస్‌పోర్ట్ రక్షణ లేదా స్వాధీనానికి సంబంధించి కోర్టులో ఒక మెమోను మాత్రమే ఫైల్ చేశారని ఆయన వెల్లడించారు.ఈ అంశంపై అడ్వకేట్ జక్కుల లక్ష్మణ్ మీడియాతో మాట్లాడుతూ.. ఇప్పటివరకు తమ తరఫు న్యాయవాదులకు లేదా కేటీఆర్‌కు ఎలాంటి అధికారిక నోటీసులు కూడా రాలేదని తెలిపారు. నోటీసులు అందకముందే పాస్‌పోర్ట్‌ను ప్రొటెక్ట్ చేయాలని ఏసీబీ అధికారులు కోరారంటూ పత్రికల్లో వస్తున్న వదంతులు అవాస్తవమని కొట్టిపారేశారు. కోర్టు నుంచి నోటీసులు వచ్చాక తాము కౌంటర్ ఫైల్ చేసి తమ వాదనలను న్యాయస్థానం ముందు వినిపిస్తామని ఆయన తెలిపారు. ఆ తర్వాత కోర్టు పాస్‌పోర్ట్‌ను ప్రొడ్యూస్ చేయమని ఆదేశించవచ్చని, లేదా ఆ పిటిషన్‌ను కొట్టివేయవచ్చని (డిస్మిస్ చేయవచ్చని) ఆయన స్పష్టం చేశారు. న్యాయస్థానం నుంచి తుది ఆదేశాలు వెలువడకముందే తప్పుడు ప్రచారాలు చేయవద్దని ఆయన కోరారు.