కొండా లక్ష్మణ్ బాపూజీ ఆశయాలను సాధిద్దాం

సంస్థాన్ నారాయణపురం, సెప్టెంబర్ 27, 2026 (హైదరాబాద్ న్యూస్‌టైమ్): తెలంగాణ ఉద్యమ ప్రాతఃస్మరనీయుడు, ప్రముఖ స్వాతంత్ర్య సమరయోధుడు ఆచార్య కొండా లక్ష్మణ్ బాపూజీ జయంతి వేడుకలను సంస్థాన్ నారాయణపురం మండల కేంద్రంలో కొండా లక్ష్మణ్ బాపూజీ నిర్మాణ కమిటీ మరియు పద్మశాలి యువజన సంఘం ఆధ్వర్యంలో అత్యంత ఘనంగా నిర్వహించారు. ఈ వేడుకలకు మునుగోడు శాసనసభ్యులు కోమటిరెడ్డి రాజగోపాల్ రెడ్డి, ఎమ్మెల్సీ నెల్లికంటి సత్యం ముఖ్య అతిథులుగా విచ్చేశారు. ఈ సందర్భంగా వారు కొండా లక్ష్మణ్ బాపూజీ చిత్రపటానికి పూలమాలలు వేసి ఘనంగా నివాళులర్పించారు. అనంతరం వారు మాట్లాడుతూ.. కొండా లక్ష్మణ్ బాపూజీ తన జీవితాన్ని పూర్తిగా ప్రజా సేవకు, సామాజిక న్యాయానికి అంకితం చేశారని కొనియాడారు. ఆయన చూపిన మార్గంలో నడుస్తూ, ఆయన ఆశయాలను ముందుకు తీసుకెళ్లేందుకు ప్రతి ఒక్కరూ కృషి చేయాలని పిలుపునిచ్చారు. సమాజంలోని అన్ని వర్గాల అభ్యున్నతికి పాటుపడటమే బాపూజీకి మనం అందించే నిజమైన నివాళి అని వారు పేర్కొన్నారు. ఈ కార్యక్రమంలో నారాయణపురం సర్పంచ్ ఉప్పల విజయలక్ష్మి లింగస్వామి, మాజీ ఎంపీపీ గుత్తా ఉమా ప్రేమ్ చందర్ రెడ్డి, పద్మశాలి యువజన సంఘం అధ్యక్షులు సురపల్లి గణేష్ నేత, పద్మశాలి సంఘం నాయకులు, యువజన నాయకులు, కార్యకర్తలు మరియు స్థానిక ప్రజలు పెద్ద సంఖ్యలో పాల్గొని నివాళులర్పించారు.