ఖైరతాబాద్ డిటెక్టివ్ ఇన్‌స్పెక్టర్ బాలస్వామి అరెస్ట్

హైదరాబాద్, అక్టోబర్ 11, 2026 (హైదరాబాద్ న్యూస్‌టైమ్): నగరంలో తీవ్ర కలకలం రేపిన ఉదంతంలో ఖైరతాబాద్ పోలీస్ స్టేషన్ డిటెక్టివ్ ఇన్స్పెక్టర్ (DI) బాలస్వామిని పోలీసులు అరెస్ట్ చేశారు. పెళ్లి చేసుకుంటానని నమ్మించి మోసం చేశాడని, గత కొంతకాలంగా లైంగికంగా వేధింపులకు గురిచేశాడని పేర్కొంటూ ఓ మహిళ ఇచ్చిన ఫిర్యాదు మేరకు సైదాబాద్ పోలీస్ స్టేషన్‌లో కేసు నమోదైంది. బాధితురాలు ఇచ్చిన ఫిర్యాదు వివరాల ప్రకారం.. 2017 సంవత్సరం నుంచి బాలస్వామి ఆమెకు పరిచయం ఉన్నాడు. భర్త మరణించిన తర్వాత కూడా బాధితురాలికి పెళ్లి చేసుకుంటానని నమ్మించి, ఆమెతో వివాహేతర సంబంధం కొనసాగించాడని ఆరోపించారు. అయితే, ఇటీవలి కాలంలో ఆమె పెళ్లి చేసుకోవాలని నిలదీయగా.. ఆయన పెళ్లికి నిరాకరించడమే కాకుండా ముఖం చాటేశాడని వాపోయారు. దీంతో మోసపోయానని గ్రహించిన బాధితురాలు సైదాబాద్ పోలీస్ స్టేషన్‌లో ఫిర్యాదు చేశారు. స్పందించిన పోలీసులు నిందితుడైన డిఐ బాలస్వామిపై భారీయ నాయ్య సంహిత (BNS) చట్టంలోని సెక్షన్లు 69, 81, 351(2), 352 కింద క్రిమినల్ కేసులు నమోదు చేశారు. ప్రస్తుతం ఈ కేసుకు సంబంధించి దర్యాప్తు వేగవంతం చేసినట్లు పోలీసులు వెల్లడించారు. పోలీస్ శాఖలో పనిచేసే అధికారే స్వయంగా ఇలాంటి లైంగిక వేధింపులు, మోసాలకు పాల్పడటం నగరంలో సంచలనం సృష్టించింది.