ట్యాంక్ బండ్‌పై పుట్టినరోజు వేడుకల్లో తీవ్ర విషాదం

హైదరాబాద్, అక్టోబర్ 5, 2026 (హైదరాబాద్ న్యూస్‌టైమ్): పుట్టినరోజు వేడుకలతో ఆనందంగా గడపాల్సిన ఆ కుటుంబంలో తీవ్ర విషాదం అలుముకుంది. కూతురి పుట్టినరోజును ఘనంగా జరుపుదామని ట్యాంక్ బండ్‌కు వెళ్లిన ఆ కుటుంబంపై విధి కన్నెర్రజేసింది. అతివేగంగా దూసుకొచ్చిన లారీ రూపంలో మృత్యువు కబలించడంతో ఆరేళ్ల చిన్నారితో పాటు ఓ యువకుడు ప్రాణాలు కోల్పోయారు. మేడ్చల్ జిల్లా ఓల్డ్ అల్వాల్ జొన్నబండ ప్రాంతానికి చెందిన సాయినాథ్, అశ్విని దంపతులు స్థానికంగా మీసేవ కేంద్రం నిర్వహిస్తూ జీవనం సాగిస్తున్నారు. వీరికి ఇద్దరు కూతుళ్లు శరణ్య (9), సరాక్షి (6) ఉన్నారు. వీరి వద్దే మూడు నెలల క్రితం వివాహం చేసుకున్న విశ్వంత్ (40) అనే వ్యక్తి కూడా అదే మీసేవ కేంద్రంలో పనిచేస్తున్నాడు. చిన్నారి సరాక్షి పుట్టినరోజు కావడంతో ఆదివారం రాత్రి కుటుంబ సభ్యులంతా కలిసి సరదాగా సెకండ్ షో సినిమా చూశారు. అనంతరం ట్యాంక్ బండ్‌పై కేక్ కట్ చేయించి చిన్నారి పుట్టినరోజు వేడుకలు జరపాలని అందరూ కలిసి అక్కడికి వెళ్లారు. వేడుకలు ముగించుకుని తిరిగి వస్తుండగా రోడ్డు దాటుతున్న సమయంలో సికింద్రాబాద్ వైపు నుండి అతివేగంగా దూసుకొచ్చిన ఒక లారీ వారిని బీభత్సంగా ఢీకొట్టింది. ఈ ఘోర రోడ్డు ప్రమాదంలో చిన్నారి సరాక్షి అక్కడికక్కడే దుర్మరణం చెందగా, తీవ్రంగా గాయపడిన విశ్వంత్‌ను వెంటనే ఆసుపత్రికి తరలించారు. అయితే పరిస్థితి విషమించడంతో ఆసుపత్రిలో చికిత్స పొందుతూ విశ్వంత్ కూడా ప్రాణాలు కోల్పోయాడు. పుట్టినరోజు జరుపుకోవాల్సిన చిన్నారితో పాటు ఇంట్లో అప్పుడే పెళ్లయిన బంధువు మృతి చెందడంతో ఆ కుటుంబంలో తీవ్ర రోదనలు మిగిలాయి. ఈ ఘటన స్థానికంగా తీవ్ర దిగ్భ్రాంతిని కలిగించింది.