తప్పుడు కేసులపై వైసీపీ కన్నెర్ర..

తిరుపతి ఆర్టీసీ బస్టాండ్ ఆవరణలో ఉద్రిక్త వాతావరణం నెలకొంది. రాష్ట్రంలో అధికారంలో ఉన్న కూటమి ప్రభుత్వ తీరును నిరసిస్తూ వైసీపీ శ్రేణులు భారీ ఎత్తున ఆందోళనకు దిగాయి.

అంబేద్కర్ విగ్రహం వద్ద ఆందోళన: తిరుపతి వైసీపీ ఇన్‌చార్జి భూమన అభినయ్ రెడ్డి నేతృత్వంలో వేలాదిగా తరలివచ్చిన పార్టీ నాయకులు, కార్యకర్తలు ఆర్టీసీ బస్టాండ్ వద్ద ఉన్న అంబేద్కర్ విగ్రహం ఎదుట బైఠాయించి నిరసన వ్యక్తం చేస్తున్నారు.

తప్పుడు కేసులంటూ మండిపాటు: కూటమి ప్రభుత్వం కక్ష సాధింపు చర్యలకు పాల్పడుతోందని, తమ పార్టీ నాయకులు, కార్యకర్తలపై ఉద్దేశపూర్వకంగా తప్పుడు కేసులు నమోదు చేస్తోందని వైసీపీ నేతలు తీవ్ర ఆగ్రహం వ్యక్తం చేస్తున్నారు.

13 మందిపై అట్రాసిటీ కేసులు: నిన్న గ్రాండ్ రిడ్జ్ హోటల్ ఎదుట రోడ్డుపై శాంతియుతంగా నిరసన తెలిపిన తమ పార్టీకి చెందిన 13 మందిపై అట్రాసిటీ కేసులు నమోదు చేయడాన్ని నిరసిస్తూ ఈ ఆందోళనకు పిలుపునిచ్చారు.

భారీగా పోలీసుల మోహరింపు: వైసీపీ భారీ ఆందోళనల నేపథ్యంలో ఎలాంటి అవాంఛనీయ ఘటనలు జరగకుండా తిరుపతి ఆర్టీసీ బస్టాండ్ ఎదుట పోలీసులు భారీ ఎత్తున మోహరించారు. పరిస్థితి అదుపు తప్పకుండా పటిష్ట బందోబస్తు ఏర్పాటు చేశారు.