తుని చిన్నారి జాను మిస్టరీ..పెంపుడు కుక్క శరీర నమూనాలు వైజాగ్ ల్యాబ్‌కు!

హైదరాబాద్ న్యూస్‌టైమ్, తుని: కాకినాడ జిల్లా తుని మండలం దొండవాక పంచాయతీ సీహెచ్ అగ్రహారం సమీపంలో అడవిలోకి వెళ్లి తప్పిపోయిన రెండేళ్ల చిన్నారి జాను (జ్ఞానేశ్వరి) ఆచూకీ 9 రోజులు గడిచినా లభించకపోవడం రాష్ట్రవ్యాప్తంగా తీవ్ర కలకలం రేపుతోంది. చిన్నారితో పాటు వెళ్లి, తిరిగి వచ్చి అనుమానాస్పదంగా మృతి చెందిన పెంపుడు కుక్కకు పశువైద్యులు పోస్ట్‌మార్టం పూర్తి చేయగా.. అది డీహైడ్రేషన్ వల్ల చనిపోయినట్లు ప్రాథమికంగా తేలింది, అయితే విషప్రయోగం ఏమైనా జరిగిందా అనే కోణంలో శరీర నమూనాలను సేకరించి విశాఖపట్నం ఫోరెన్సిక్ ల్యాబ్‌కు పంపారు. ఈ హృదయ విదారక ఘటనపై ఏపీ డిప్యూటీ సీఎం పవన్ కళ్యాణ్ తీవ్రంగా స్పందించి జిల్లా ఎస్పీతో సమీక్ష జరపగా, ఆయన ఆదేశాల మేరకు రంగంలోకి దిగిన మరో 30 మంది ఎన్డీఆర్ఎఫ్ (NDRF), హనుమాన్ ప్రత్యేక బృందాలు దట్టమైన అటవీ ప్రాంతాన్ని జల్లెడ పడుతున్నాయి. సాంకేతిక ఆధారాల పరంగా ఘటనా స్థలం చుట్టుపక్కల గల 7 సెల్ టవర్ల పరిధిలోని సుమారు 4,800 ఫోన్ కాల్స్ డేటాను పోలీసులు క్షుణ్ణంగా విశ్లేషించి, కొందరు అనుమానితులను గుర్తించి విచారణను మరింత ముమ్మరం చేశారు.