తెలంగాణ అసెంబ్లీ వద్ద బీఆర్ఎస్ మహిళా ఎమ్మెల్యేలపై దాడి కేసులో కీల‌క మ‌లుపు

హైదరాబాద్, సెప్టెంబర్ 29, 2026 (హైదరాబాద్ న్యూస్‌టైమ్): తెలంగాణ అసెంబ్లీ వద్ద గతంలో బీఆర్ఎస్ మహిళా ఎమ్మెల్యేలపై దౌర్జన్యం చేసి, దాడికి పాల్పడిన పోలీసు అధికారులను వెంటనే గుర్తించాలని రాష్ట్ర ఉన్నతన్యాయస్థానం డీజీపీని ఆదేశించింది. ఈ ఘటనకు సంబంధించి పోలీసులు తీసుకునే శాఖాపరమైన చర్యల పూర్తి నివేదికను శాసనసభ స్పీకర్ ముందు ఉంచాలని హైకోర్టు కీలక ఆదేశాలు జారీ చేసింది. విచారణ సందర్భంగా హైకోర్టు స్పందిస్తూ.. మహిళా ఎమ్మెల్యేలు పోలీసులతో అసభ్యంగా లేదా అమర్యాదకరంగా ప్రవర్తించినట్లు ఎలాంటి దృశ్య ఆధారాలు గానీ, ఇతర సాక్ష్యాలు గానీ ఎక్కడా లేవని తేల్చి చెప్పింది. శాసనసభ్యులుగా ప్రజల చేత ఎన్నుకోబడిన మహిళా ప్రతినిధుల పట్ల పోలీసులు వ్యవహరించిన తీరుపై న్యాయస్థానం తీవ్ర ఆరా తీసింది. ప్రజాస్వామ్య యుతంగా నిరసన తెలుపుతున్న మహిళా ఎమ్మెల్యేలపై విధి నిర్వహణ పేరుతో భౌతిక దాడికి పాల్పడటం సరికాదని అభిప్రాయపడింది. ఈ మొత్తం వ్యవహారంలో బాధ్యులైన పోలీసు సిబ్బందిని గుర్తించి వారిపై తీసుకున్న మరియు తీసుకోబోయే చర్యల వివరాలతో కూడిన సమగ్ర నివేదికను త్వరలోనే స్పీకర్‌కు అందజేయాలని హైకోర్టు స్పష్టం చేసింది. ఈ తీర్పుతో రాష్ట్ర రాజకీయ వర్గాల్లో తీవ్ర చర్చనీయాంశమైంది.