హైదరాబాద్, అక్టోబర్ 9, 2026 (హైదరాబాద్ న్యూస్‌టైమ్): ఎన్నికల సంఘం చేపట్టిన ప్రత్యేక తీవ్ర సవరణ (SIR) ప్రక్రియలో భాగంగా తెలంగాణలో భారీ సంఖ్యలో ఓట్లు తొలగింపుకు గురికావడం రాజకీయంగా తీవ్ర చర్చనీయాంశమైంది. దేశంలోని అన్ని రాష్ట్రాలతో పోలిస్తే తెలంగాణలోనే అత్యధికంగా ఓట్లు తొలగించారని విపక్షాలు తీవ్రస్థాయిలో మండిపడుతున్నాయి. ఈ ఎస్‌ఐఆర్ (SIR) ప్రక్రియ ద్వారా తెలంగాణలో దాదాపు 95 లక్షల ఓట్లు (27.8%) తొలగింపు జాబితాలో చేర్చినట్లు సమాచారం. ఈ ప్రక్రియకు ముందు రాష్ట్రంలో 3.38 కోట్ల మంది ఓటర్లు ఉండగా, సవరణ అనంతరం ఆ సంఖ్య 2.43 కోట్లకు పడిపోయే అవకాశం ఉంది. ఇతర రాష్ట్రాలతో పోలిస్తే మహారాష్ట్రలో 2.07 కోట్లు (21.1%), ఉత్తరప్రదేశ్‌లో 2.04 కోట్లు (13.21%), కర్ణాటకలో 1.06 కోట్లు (19.5%), పశ్చిమ బెంగాల్‌లో కేవలం 11.6% (88.9 లక్షలు) మాత్రమే ఓట్లు తొలగించగా, తెలంగాణలో అత్యధిక శాతంలో కోత విధించడం గమనార్హం.
జీహెచ్‌ఎంసీ పరిధిలోనే అత్యధికం: ముఖ్యంగా హైదరాబాద్ మరియు శివారు ప్రాంతాల్లోని 28 నియోజకవర్గాల్లోనే సుమారు 43 లక్షల ఓట్లను తొలగింపు జాబితాలో చేర్చారు. రాష్ట్రంలోని 119 నియోజకవర్గాల్లో శేరిలింగంపల్లిలో అత్యధికంగా ఓట్లు తొలగిస్తుండగా, రాష్ట్రవ్యాప్తంగా దాదాపు 25 నియోజకవర్గాల్లో లక్షకు పైగా ఓట్లు తొలగింపునకు గురవుతున్నాయి.
ప్రధాన నియోజకవర్గాల వారీగా తొలగింపు జాబితా అంచనా:
- శేరిలింగంపల్లి – 3,29,828
- కుత్బుల్లాపూర్ – 2,76,924
- ఎల్‌బీ నగర్ – 2,70,284
- రాజేంద్రనగర్ – 2,47,005
- మహేశ్వరం – 2,35,331
- ఉప్పల్ – 2,18,323
- మేడ్చల్ – 2,13,122
- మల్కాజిగిరి – 1,92,957
- జూబ్లీహిల్స్ – 1,79,510
- కూకట్‌పల్లి – 1,70,240
బీఆర్ఎస్ తీవ్ర నిరసనలు: ఓట్ల తొలగింపు ప్రక్రియలో పెద్దఎత్తున అవకతవకలు జరిగాయని, ఇది అధికార పార్టీ ప్రయోజనాల కోసం కావాలని చేస్తున్న కుట్ర అని విపక్షాలు ఆరోపిస్తున్నాయి. ఈ ప్రజాస్వామ్య వ్యతిరేక విధానాలకు బాధ్యత వహిస్తూ కేంద్ర ఎన్నికల సంఘం (CEC) చీఫ్ జ్ఞానేష్ కుమార్ తక్షణమే రాజీనామా చేయాలని డిమాండ్ చేస్తూ బీఆర్ఎస్ పార్టీ ఆధ్వర్యంలో రాష్ట్రవ్యాప్తంగా పెద్దఎత్తున నిరసనలకు సిద్ధమవుతున్నారు.