నిర్మల్, అక్టోబర్ 5, 2026 (హైదరాబాద్ న్యూస్‌టైమ్): నిర్మల్ జిల్లా వ్యాప్తంగా డిజిటల్ రేషన్ కార్డుల పంపిణీ కార్యక్రమం సోమవారం అత్యంత ఉత్సాహంగా ప్రారంభమైంది. జిల్లా కేంద్రంతో పాటు అన్ని మండలాల పరిధిలోని గ్రామాలు, భైంసా మున్సిపాలిటీలోని చౌక ధరల (ఫెయిర్ ప్రైస్) దుకాణాల ద్వారా లబ్ధిదారులకు అధికారులు, ప్రజాప్రతినిధుల సమక్షంలో డిజిటల్ రేషన్ కార్డులను పంపిణీ చేశారు. ఈ కార్యక్రమంలో భైంసా పట్టణ MIM టౌన్ ప్రెసిడెంట్ ఫైజులఖాన్, కౌన్సిలర్ ఆజం, ఖదీర్, నవాబ్ అలీ, జాహిద్ అలీతో పాటు పలువురు ప్రజాప్రతినిధులు, లబ్ధిదారులు పెద్ద సంఖ్యలో పాల్గొన్నారు.
లబ్ధిదారులు, అధికారుల స్పందన:
- షేక్ సమీర్ (లబ్ధిదారుడు, నిర్మల్ జిల్లా): గత ప్రభుత్వాల హయాంలో డిజిటల్ రేషన్ కార్డులు అందక అనేక ఇబ్బందులు పడ్డామని, ప్రస్తుతం తెలంగాణ ప్రభుత్వం నిరుపేదలకు ఎలాంటి కష్టాలు కలగకూడదనే ఉద్దేశంతో డిజిటల్ కార్డులు అందిస్తుండటం ఎంతో సంతోషంగా ఉందని హర్షం వ్యక్తం చేశారు. జిల్లాలోని ప్రతి ఒక్కరూ తమ చౌక ధరల దుకాణాలను సందర్శించి డిజిటల్ కార్డులను సద్వినియోగం చేసుకోవాలని కోరుతూ ప్రభుత్వానికి కృతజ్ఞతలు తెలిపారు.
- ఆజం (మున్సిపల్ కౌన్సిలర్, భైంసా): ప్రభుత్వం ఎంతో ప్రతిష్టాత్మకంగా అందిస్తున్న ఈ డిజిటల్ రేషన్ కార్డుల వల్ల ప్రజలకు ఎంతో లబ్ధి చేకూరుతుందని, వార్డు ప్రజలందరూ ఈ సేవలను సద్వినియోగం చేసుకోవాలని ఉర్దూలో విజ్ఞప్తి చేశారు.
- జాహిద్ అలీ (చౌక ధరల దుకాణం డీలర్): నిర్మల్ జిల్లా కేంద్రంతో పాటు భైంసా పట్టణంలోని తమ రేషన్ దుకాణంలో ఉదయం నుంచే డిజిటల్ రేషన్ కార్డుల పంపిణీని ప్రారంభించామని, లబ్ధిదారులు ఎవరూ ఆందోళన చెందకుండా సకాలంలో వచ్చి తమ కార్డులను తీసుకోవాలని కోరారు.