నేనున్నానంటూ బాధితులకు అండగా నిలిచిన బీఆర్ఎస్ నేత ప‌ట్నం న‌రేంద‌ర్ రెడ్డి

వికారాబాద్ / కొడంగల్, సెప్టెంబర్ 29, 2026 (హైదరాబాద్ న్యూస్‌టైమ్): కొడంగల్ నియోజకవర్గం మద్దూరులో ఎలాంటి ముందస్తు నోటీసులు ఇవ్వకుండా పేదల ఇళ్లను కూల్చివేయడం పట్ల బీఆర్ఎస్ నేత పట్నం నరేందర్ రెడ్డి తీవ్ర ఆగ్రహం వ్యక్తం చేశారు. నివాసాలు కోల్పోయి రోడ్డున పడిన బాధితులకు తాము అండగా ఉంటామని భరోసా కల్పించారు. ఇల్లు కోల్పోయిన ప్రతి కుటుంబానికి వెంటనే ప్రభుత్వం రెండు వందల గజాల చొప్పున ఇంటి స్థలాన్ని కేటాయించాలని ఆయన డిమాండ్ చేశారు. బాధిత కుటుంబాలను పరామర్శించిన అనంతరం పట్నం నరేందర్ రెడ్డి మాట్లాడుతూ.. పేదల పొట్ట కొట్టేలా ప్రభుత్వం వ్యవహరిస్తున్న తీరు సరికాదని మండిపడ్డారు. కనీస సమాచారం ఇవ్వకుండా, ఎలాంటి ప్రత్యామ్నాయ ఏర్పాట్లు చేయకుండా ఇళ్లను కూల్చివేయడం అత్యంత హేయమైన చర్య అని విమర్శించారు. నిరుపేదల కన్నీళ్లతో ప్రభుత్వం కాలం వెల్లదీయాలని చూస్తే తగిన మూల్యం చెల్లించుకోవాల్సి వస్తుందని హెచ్చరించారు. వెంటనే బాధితులకు నష్టపరిహారంతో పాటు రెండు వందల గజాల స్థలాన్ని ఇచ్చి ఆదుకోవాలని ఆయన డిమాండ్ చేశారు.