పంటలు ఎండబెట్టిన పాపాత్ములు దొరికేశారు..

చంద్రగిరి: చంద్రగిరి, రామచంద్రాపురం పోలీసు స్టేషన్ల పరిధిలో గత కొంతకాలంగా రైతులను బెంబేలెత్తిస్తున్న విద్యుత్ ట్రాన్స్‌ఫార్మర్ల దొంగల ముఠాను ఎట్టకేలకు పోలీసులు పట్టుకున్నారు. వరుస చోరీలతో పంటలు ఎండిపోయి కన్నీరుమున్నీరవుతున్న రైతులకు పోలీసుల చర్యతో భారీ ఊరట లభించింది.

• రైతులకు కన్నీళ్లే మిగిల్చిన చోరీలు: విద్యుత్ ట్రాన్స్‌ఫార్మర్లు చోరీకి గురవడంతో మోటార్లు పనిచేయక, పంట పొలాలకు నీరందక రైతులు తీవ్ర నష్టాలను ఎదుర్కొన్నారు. ఒక ట్రాన్స్‌ఫార్మర్ దొంగతనానికి గురైతే, అధికారులు దాని స్థానంలో మరొకటి అమర్చేలోపే చేతికందిన పంటలు ఎండిపోయి రైతులు తీవ్ర ఆవేదన వ్యక్తం చేశారు.
• 60కి పైగా ట్రాన్స్‌ఫార్మర్ల మాయం: చంద్రగిరి, రామచంద్రాపురం పోలీస్ స్టేషన్ల పరిధిలో ఈ ముఠా ఏకంగా 60కి పైగా ట్రాన్స్‌ఫార్మర్లను అపహరించినట్లు అంచనా వేస్తున్నారు.
• రంగంలోకి స్పెషల్ టీమ్స్: వరుస దొంగతనాలపై సీరియస్ అయిన పోలీస్ యంత్రాంగం, ప్రత్యేక బృందాలను (స్పెషల్ టీమ్స్) ఏర్పాటు చేసింది. గత నెల రోజులుగా రాత్రి, పగలు అనే తేడా లేకుండా తీవ్రంగా శ్రమించి గాలింపు చర్యలు చేపట్టి ఎట్టకేలకు దొంగల ఆచూకీ కనిపెట్టి పట్టుకున్నారు.
• సూత్రధారుల కోసం దర్యాప్తు: పట్టుబడ్డ దొంగల ముఠాను విచారిస్తున్న పోలీసులు, ఈ భారీ చోరీల వెనుక ఉన్న ప్రధాన సూత్రధారులు ఎవరనే కోణంలో దర్యాప్తు ముమ్మరం చేశారు. దొంగలు పట్టుబడటంతో రైతులు హర్షం వ్యక్తం చేస్తున్నారు.
• కులాల ముసుగులో కాపాడే యత్నం: ఇదిలా ఉంటే.. పోలీసుల విచారణలో కీలక విషయాలు బయటపడుతుండగా, కొందరు వ్యక్తులు కులాలను అడ్డం పెట్టుకుని ఈ ట్రాన్స్‌ఫార్మర్ల దొంగలను కేసు నుంచి తప్పించేందుకు తెరవెనుక ప్రయత్నాలు చేస్తుండటం గమనార్హం.