నిర్మల్, అక్టోబర్ 2, 2026 (హైదరాబాద్ న్యూస్‌టైమ్): దేశవ్యాప్తంగా పనిచేస్తున్న జర్నలిస్టుల దీర్ఘకాలిక డిమాండ్లను పరిష్కరించాలని కోరుతూ ఐజేయూ పిలుపుమేరకు మహాత్మా గాంధీ జయంతిని పురస్కరించుకుని నిర్మల్ జిల్లా కేంద్రంలో టీయూడబ్ల్యూజే (ఐజేయూ) ఆధ్వర్యంలో 'డిమాండ్స్ డే' నిరసన కార్యక్రమం అత్యంత హోరాహోరీగా సాగింది. టీయూడబ్ల్యూజే జిల్లా అధ్యక్షులు కొండూరి రవీందర్, ప్రధాన కార్యదర్శి భూమయ్య నేతృత్వంలో జర్నలిస్టులు పెద్ద సంఖ్యలో కదిలివచ్చి తమ నిరసన గళాన్ని వినిపించారు. ఈ సందర్భంగా నిర్మల్‌లోని ఆర్ అండ్ బీ గెస్ట్ హౌస్ నుండి గాంధీ పార్క్ వరకు జర్నలిస్టులు భారీ నిరసన ర్యాలీ నిర్వహించారు. అనంతరం గాంధీ పార్క్ వద్ద మహాత్మా గాంధీ విగ్రహం ఎదుట బైఠాయించి నిరసన తెలిపి, గాంధీ విగ్రహానికే నేరుగా వినతిపత్రం అందజేశారు. అనంతరం ఆర్డీవో దేవిదాస్ ద్వారా దేశ రాష్ట్రపతికి పంపేందుకు అధికారిక వినతిపత్రాన్ని అందజేశారు.
జాతీయ స్థాయిలో సమగ్ర మీడియా కమిషన్ ఏర్పాటు చేయాలి: కొండూరి రవీందర్ ఈ నిరసన కార్యక్రమంలో టీయూడబ్ల్యూజే జిల్లా అధ్యక్షులు కొండూరి రవీందర్ మాట్లాడుతూ.. గాంధీ జయంతి రోజైన నేడు 'పనిచేస్తున్న పాత్రికేయుల డిమాండ్ల దినం'గా పాటిస్తున్నట్లు తెలిపారు. ఆధునిక యుగానికి అనుగుణంగా మీడియా రంగాన్ని సమగ్రంగా సమీక్షించడానికి ఒక నూతన 'సమగ్ర మీడియా కమిషన్'ను కేంద్ర ప్రభుత్వం ఏర్పాటు చేయాలని డిమాండ్ చేశారు. ప్రజాస్వామ్యానికి నాల్గవ స్తంభంగా నిలుస్తున్న జర్నలిస్టులు, మీడియా సంస్థల భద్రత కోసం ఒక ప్రత్యేక కేంద్ర చట్టాన్ని రూపొందించాలని కోరారు.
శారీరక దాడులు, ఏకపక్ష నిర్బంధాలు, ఆన్‌లైన్ వేధింపులు, సంస్థాగత బెదిరింపుల నుండి మీడియా సిబ్బందిని కాపాడేందుకు పటిష్టమైన స్వతంత్ర జాతీయ చట్టం రావాలని, 1955, 1958 చట్టాల కింద మొదటగా హామీ ఇవ్వబడిన ప్రత్యేక రక్షణలను తక్షణమే పునరుద్ధరించాలని డిమాండ్ చేశారు. అలాగే ద్రవ్యోల్బణం విపరీతంగా పెరిగిన నేపథ్యంలో, మీడియా కార్మికులకు న్యాయమైన వేతన నవీకరణలు అందేలా నూతన 'వేతన మండలి'ని ఏర్పాటు చేయాలని విజ్ఞప్తి చేశారు.
రాష్ట్ర ప్రభుత్వాన్ని హెచ్చరించిన జర్నలిస్టులు: తెలంగాణలో కాంగ్రెస్ ప్రభుత్వం తన ఎన్నికల ప్రణాళికలో ఇచ్చిన హామీ మేరకు జర్నలిస్టులకు ఇళ్లు, ఇళ్ల స్థలాల సమస్యను శాశ్వతంగా పరిష్కరించాలని డిమాండ్ చేశారు. ప్రభుత్వ ఉద్యోగుల మాదిరిగానే జర్నలిస్టులకు హెల్త్ కార్డులు మంజూరు చేసి కార్పొరేట్ ఆసుపత్రులలో క్యాష్‌లెస్ ట్రీట్‌మెంట్ అందించాలని, జర్నలిస్టులపై నిత్యం జరుగుతున్న దాడులను అరికట్టేందుకు ప్రత్యేక రక్షణ చట్టం తీసుకురావాలని కోరారు.
వివిధ సంఘాల సంపూర్ణ మద్దతు: జర్నలిస్టుల ఆందోళనకు వివిధ ప్రజా సంఘాల నాయకులు సంపూర్ణ మద్దతు ప్రకటించారు. సీపీఐఎంఎల్ మాస్ లైన్ ప్రజా పంథా ఉమ్మడి జిల్లా కార్యదర్శి నంది రామయ్య, నిర్మల్ జిల్లా కార్యదర్శి కే. రాజన్న, పీడీఎస్‌యూ జిల్లా కార్యదర్శి కిరణ్, బీసీ ఎస్సీ ఎస్టీ సంఘం జిల్లా అధ్యక్షులు వై. సాయన్న, ధర్మ సమాజ్ పార్టీ రాష్ట్ర కార్యదర్శి రామగిరి రవీందర్, ఆమ్ ఆద్మీ పార్టీ రాష్ట్ర జాయింట్ సెక్రటరీ హైదర్ తదితరులు ఈ నిరసనలో పాల్గొని మాట్లాడారు. జర్నలిస్టుల న్యాయమైన పోరాటానికి తమ పూర్తి మద్దతు ఉంటుందని స్పష్టం చేశారు.
ఈ కార్యక్రమంలో ఐజేయూ జాతీయ కౌన్సిల్ సభ్యులు గాండ్ల రాజశేఖర్, రాష్ట్ర కౌన్సిల్ సభ్యులు సోమ ప్రమోద్ రెడ్డి, జిల్లా కోశాధికారి ప్రశాంత్, ఉపాధ్యక్షులు మనోజ్, వేణు, అశోక్, రవీందర్, సంయుక్త కార్యదర్శి హనుమాండ్లు, జిల్లా కమిటీ సభ్యులు మధు, రవి కుమార్, రాజేశం, లింగేష్, షిండే మహేష్, గౌతమ్, ఖానాపూర్ ప్రెస్ క్లబ్ మాజీ అధ్యక్షులు సట్ల శంకర్, కైసర్, సంకేత్, పర్వేజ్, సాజిద్, రాకేష్, ఉస్మాన్, శ్రీనివాస్ తదితరులు పెద్ద సంఖ్యలో పాల్గొన్నారు.