పింఛన్ల పేరుతో అక్రమ వసూళ్లు,కలెక్టర్‌కు ఫిర్యాదు!

సంస్థాన్ నారాయణపురం, యాదాద్రి భువనగిరి, అక్టోబర్ 5, 2026 (హైదరాబాద్ న్యూస్‌టైమ్): యాదాద్రి భువనగిరి జిల్లా సంస్థాన్ నారాయణపురం మండలం వెంకటాంబవి తండాలో గ్రామ పంచాయతీ సిబ్బంది సామాజిక పింఛన్ల పేరుతో సామాన్య ప్రజల నుంచి అక్రమ వసూళ్లకు పాల్పడుతున్నారు. లబ్ధిదారులను భయబ్రాంతులకు గురిచేస్తూ అందినకాడికి దండుకుంటున్న సిబ్బంది తీరుపై విసిగిపోయిన తండావాసులు నేరుగా జిల్లా కలెక్టర్‌ను ఆశ్రయించి లిఖితపూర్వకంగా ఫిర్యాదు సమర్పించారు. గ్రామ పంచాయతీలో పనిచేస్తున్న కోర్ర రఘు అనే వ్యక్తి కొత్త పింఛన్ల దరఖాస్తుల ఆమోదం కోసం అమాయక ప్రజల వద్ద నుంచి రూ. 500 బలవంతంగా వసూలు చేస్తున్నాడని బాధితులు తమ ఫిర్యాదులో పేర్కొన్నారు. అంతేకాకుండా ఆన్‌లైన్ సిస్టమ్ ఆపరేటర్ ఎంట్రీ పేరిట మరో రూ. 1,000 చొప్పున అక్రమంగా వసూలు చేస్తూ నిలువుదోపిడీ చేస్తున్నట్లు ఆవేదన వ్యక్తం చేశారు. ప్రభుత్వ సంక్షేమ పథకాన్ని అందిస్తామని నమ్మబలకాల్సిన వ్యక్తులే, పింఛన్ ఇప్పిస్తానని చెప్పి బెదిరింపులకు గురిచేస్తున్నారని, ఎటువంటి అధికారిక రశీదులు ఇవ్వకుండా ప్రజలను తీవ్రంగా మోసం చేస్తున్నారని వాపోయారు. కేవలం పింఛన్ల వసూళ్లే కాకుండా, గ్రామ పంచాయతీకి చెందిన ట్రాక్టర్ డీజిల్ వినియోగంలోనూ భారీగా అక్రమాలకు పాల్పడుతున్నట్లు తండావాసులు ఆరోపించారు. ప్రభుత్వ ధనాన్ని, నిరుపేదల కష్టార్జితాన్ని లూటీ చేస్తున్న ఇలాంటి అవినీతి సిబ్బందిపై వెంటనే సమగ్ర విచారణ జరిపించాలని కోరారు. తండా ప్రజలను ఇబ్బంది పెడుతున్న సదరు సిబ్బందిపై ఉన్నతాధికారులు స్పందించి తక్షణమే కఠిన చర్యలు తీసుకోవాలని జిల్లా కలెక్టర్‌ను విజ్ఞప్తి చేశారు.