నిర్మల్, అక్టోబర్ 9, 2026 (హైదరాబాద్ న్యూస్‌టైమ్): నిర్మల్ జిల్లా ప్రజలు తమ సమస్యలను మరింత సులభంగా, వేగంగా పరిష్కరించుకునేందుకు వీలుగా ప్రత్యేక వాట్సాప్ గ్రీవెన్స్ సెల్‌ను అందుబాటులోకి తీసుకువచ్చినట్లు జిల్లా కలెక్టర్ భవేశ్ మిశ్రా గురువారం ఒక ప్రకటనలో తెలిపారు. ప్రజలు తమ ఫిర్యాదులు, వినతుల కోసం ప్రతిసారీ నేరుగా కలెక్టరేట్‌కు రావాల్సిన శ్రమను తగ్గించేలా ఇంటి వద్ద నుంచే అధికారుల దృష్టికి సమస్యలను తీసుకెళ్లేందుకు ఈ డిజిటల్ వేదికను ఏర్పాటు చేసినట్లు పేర్కొన్నారు.
వాట్సాప్ నంబర్ మరియు ఫిర్యాదుల విధానం: జిల్లా ప్రజలు తమ సమస్యలపై ఫిర్యాదులను 8317557897 అనే వాట్సాప్ నంబర్‌కు మెసేజ్ రూపంలో పంపవచ్చని కలెక్టర్ తెలిపారు. ఫిర్యాదుతో పాటు సమస్యకు సంబంధించిన పూర్తి వివరాలు, సమస్య ఉన్న ప్రదేశం, చిరునామా, తగిన ఆధారాలు లేదా ఫొటోలను స్పష్టంగా పంపించాలని సూచించారు. ప్రజల నుంచి అందే ప్రతి ఫిర్యాదును ప్రత్యేక బృందం నమోదు చేసుకుని, వెంటనే సంబంధిత శాఖాధికారులకు సిఫార్సు చేస్తుందని చెప్పారు. ఫిర్యాదుల పరిష్కార పురోగతిని ఎప్పటికప్పుడు పర్యవేక్షించి, నిర్ణీత కాలపరిమితిలోగా సమస్యలను పరిష్కరించేందుకు కఠిన చర్యలు తీసుకుంటామని కలెక్టర్ స్పష్టం చేశారు. జిల్లా ప్రజలు ఈ వాట్సాప్ గ్రీవెన్స్ సెల్ సేవలను పూర్తిస్థాయిలో సద్వినియోగం చేసుకోవాలని కోరారు. కేవలం ప్రజా సమస్యలు, ప్రభుత్వ సేవలకు సంబంధించిన ఫిర్యాదులను మాత్రమే ఈ నంబర్‌కు పంపాలని, అనవసరమైన లేదా తప్పుడు సందేశాలను పంపవద్దని హెచ్చరించారు. అలాగే ఈ నంబర్‌ను కేవలం వాట్సాప్ సేవల కోసం మాత్రమే వినియోగించాలని, ఎవరూ దీనికి ఫోన్ కాల్స్ చేయరాదని జిల్లా కలెక్టర్ విజ్ఞప్తి చేశారు.