న్యూఢిల్లీ, ఆగస్ట్ 23, 2026 (హైదరాబాద్ న్యూస్‌టైమ్): ఆహారంలో (కీర)దోసకాయలను క్రమం తప్పకుండా చేర్చుకోవడం వల్ల శరీరానికి తగినంత నీటితో పాటు అనేక ఆరోగ్య ప్రయోజనాలు అందుతాయని వైద్య నిపుణులు వెల్లడిస్తున్నారు. (కీర) దోసకాయలలో తక్కువ కేలరీలు, కొవ్వు, సోడియం ఉండి, విటమిన్లు మరియు ఖనిజాలు పుష్కలంగా లభిస్తాయి. ఇవి హైడ్రేషన్‌ను పెంచడంతో పాటు రోగనిరోధక శక్తిని మెరుగుపరచడంలో అద్భుతంగా పనిచేస్తాయి.
దోసకాయలు తినడం వల్ల కలిగే ప్రధాన ఆరోగ్య ప్రయోజనాలు:
- శరీరంలో నీటిశాతం (హైడ్రేషన్) పెంపు: (కీర) దోసకాయలలో సుమారు 96% నీరు ఉంటుంది. ఇది శరీర ఉష్ణోగ్రతను క్రమబద్ధీకరించడానికి, కీళ్లను ఆరోగ్యంగా ఉంచడానికి మరియు కణాలకు పోషకాలను అందించడానికి సహాయపడుతుంది.
- ఎముకల బలానికి: (కీర)దోసకాయలలో విటమిన్ కె అధికంగా ఉంటుంది. ఇది ఎముకల ఆరోగ్యానికి ఎంతగానో దోహదపడుతుంది.
- క్యాన్సర్ ముప్పు తగ్గింపు: ఇందులో ఉండే లిగ్నాన్స్ (lignans) అనే ప్లాంట్ కాంపౌండ్స్ యాంటీ ఆక్సిడెంట్లుగా పనిచేసి, కొన్ని రకాల క్యాన్సర్లు రాకుండా నివారించడంలో సహాయపడతాయి.
- గుండె ఆరోగ్యం: (కీర)దోసకాయలలో లభించే ఫ్లేవనాయిడ్లు రక్తనాగాల్లో ప్లేక్ పేరుకుపోకుండా అడ్డుకోవడంతో పాటు గుండె జబ్బుల ముప్పును తగ్గిస్తాయి.
- బ్లడ్ షుగర్ నియంత్రణ: ఇవి రక్తంలో గ్లూకోజ్ స్థాయిలను తగ్గించడంలో (antihyperglycemic) సహాయపడతాయని, డయాబెటిస్ ఉన్నవారికి ఇది మంచి ఆహారమని అధ్యయనాలు చెబుతున్నాయి.
- వాపులు, చర్మ సంరక్షణ: దోసకాయలలోని యాంటీ ఇన్ఫ్లమేటరీ గుణాలు శరీరంలో వాపులను తగ్గించడమే కాకుండా, చర్మంపై మంట, ఎండ దెబ్బలను తగ్గించి చర్మాన్ని ఆరోగ్యంగా ఉంచుతాయి.
పోషక విలువలు: ఒక మోస్తరు (కీర)దోసకాయలో సుమారు 45 కేలరీలు, 2 గ్రాముల ప్రొటీన్, 11 గ్రాముల కార్బోహైడ్రేట్లు, 1.5 గ్రాముల ఫైబర్, 5 గ్రాముల చక్కెర, 442 మి.గ్రా. పొటాషియం మరియు 49 మైక్రోగ్రాముల విటమిన్ కె లభిస్తాయి.
కొన్ని జాగ్రత్తలు: (కీర)దోసకాయలు ఎంతో ఆరోగ్యకరమైనప్పటికీ, జీర్ణ సమస్యలు (IBS) ఉన్నవారు పరిమితంగా తీసుకోవడం మంచిది. అలాగే రక్తం గడ్డకట్టకుండా మందులు వాడేవారు, విటమిన్ కె ఎక్కువగా ఉండే దోసకాయలను తీసుకునేటప్పుడు వైద్యుల సలహా తీసుకోవడం ముఖ్యం.