బస్సు-రైలు ఢీ, ఎనిమిది మంది మృతి

• మక్కాసన్ రైల్వే క్రాసింగ్ వద్ద దారుణం..
• పూర్తిగా తగలబడిన ఎయిర్ కండిషన్డ్ బస్సు
• మంటల్లో చిక్కుకుని 8 మంది సజీవదహనం..
• మరో 25 మందికి తీవ్ర గాయాలు

హైదరాబాద్ న్యూస్ టైమ్, అంతర్జాతీయ డెస్క్: థాయిలాండ్ రాజధాని బ్యాంకాక్‌లో శనివారం మధ్యాహ్నం జరిగిన భారీ రైలు ప్రమాదంలో మృతుల సంఖ్య మరింత పెరిగింది. మక్కాసన్ ఎయిర్‌పోర్ట్ రైల్వే లింక్ స్టేషన్ సమీపంలోని అశోక్-దిన్ డేంగ్ రోడ్డుపై ఒక గూడ్స్ రైలు, పబ్లిక్ ఎయిర్ కండిషన్డ్ బస్సుతో పాటు పలు కార్లు, మోటార్ సైకిళ్లను బలంగా ఢీకొట్టింది. ఈ ఘోర ప్రమాద తీవ్రతకు బస్సులో ఒక్కసారిగా పెద్ద ఎత్తున మంటలు చెలరేగి, వరుస పేలుళ్లు సంభవించడంతో ప్రయాణికులు లోపలే చిక్కుకుపోయారు. అగ్నిమాపక సిబ్బంది మంటలను అదుపు చేసిన అనంతరం బస్సు శకలాల నుండి కనీసం 8 మంది మృతదేహాలను వెలికితీసినట్లు బ్యాంకాక్ అత్యవసర వైద్య విభాగాలు (ఎరవాన్ మెడికల్ సెంటర్) ధృవీకరించాయి. ఈ దుర్ఘటనలో మరో 25 మంది తీవ్రంగా గాయపడగా, వారిని చికిత్స నిమిత్తం సమీప ఆసుపత్రులకు తరలించారు. ప్రమాదం కారణంగా సదరు ప్రధాన రహదారిపై కిలోమీటర్ల మేర ట్రాఫిక్ స్తంభించిపోవడంతో ప్రయాణికులు ప్రత్యామ్నాయ మార్గాల్లో వెళ్లాలని పోలీసులు సూచించారు.