బాసర, నిర్మల్ జిల్లా, అక్టోబర్ 12, 2026 (హైదరాబాద్ న్యూస్‌టైమ్): దక్షి భారతదేశంలోనే అత్యంత ప్రసిద్ధిగాంచిన బాసర శ్రీ జ్ఞాన సరస్వతి అమ్మవారి ఆలయంలో శారదీయ శరన్నవరాత్రి ఉత్సవాలు అత్యంత వైభవంగా ప్రారంభమయ్యాయి. నేటి నుండి ఈ నెల 20వ తేదీ (దసరా) వరకు వైభవంగా సాగే ఈ నవరాత్రుల వేడుకలకు ఆలయ అధికారులు సర్వం సిద్ధం చేశారు. చదువుల తల్లి బాసర అమ్మవారిని దర్శించుకుని తమ చిన్నారులకు అక్షరాభ్యాసం చేయించడానికి తెలంగాణ, ఆంధ్రప్రదేశ్, మహారాష్ట్ర, తమిళనాడు, ఉత్తరప్రదేశ్ తదితర ప్రాంతాల నుండి భక్తులు భారీ సంఖ్యలో తరలివస్తున్నారు. అమ్మవారి సన్నిధిలో అక్షరాభ్యాసం చేయిస్తే పిల్లలు గొప్ప విద్యావంతులు, మేధావులుగా ఎదుగుతారని భక్తుల ప్రగాఢ నమ్మకం. ఈ తొమ్మిది రోజుల పాటు అమ్మవారు భక్తులకు వివిధ రూపాల్లో నవదుర్గా అలంకారాల్లో దర్శనమివ్వనున్నారు.
అన్ని ఏర్పాట్లు పూర్తి చేశాం: ఆలయ ఈవో అంజలీదేవి దేవి శరన్నవరాత్రి ఉత్సవాల ఏర్పాట్లపై బాసర ఆలయ ఈవో అంజలీదేవి మాట్లాడుతూ.. భక్తులకు ఎలాంటి అసౌకర్యం కలగకుండా అన్ని ముందస్తు ఏర్పాట్లు పూర్తి చేసినట్లు వెల్లడించారు. ముఖ్యంగా ఈ నెల 16న అమ్మవారి జన్మ నక్షత్రమైన మూల నక్షత్రం సందర్భంగా భక్తులు భారీ సంఖ్యలో వచ్చే అవకాశం ఉన్నందున ప్రత్యేక చర్యలు తీసుకున్నట్లు తెలిపారు.
ఉత్సవాలకు వచ్చే భక్తులు, చిన్నారుల సౌకర్యార్థం ప్రత్యేక క్యూ లైన్లను ఏర్పాటు చేశామని, క్యూ లైన్లలో వేచి ఉండే వారికి తాగునీరు, పాలు, బిస్కెట్లు, పండ్లు, మజ్జిగ నిరంతరం పంపిణీ చేస్తున్నట్లు చెప్పారు. అమ్మవారి సన్నిధిలో అక్షరాభ్యాసాలు చేయించే వారి కోసం ప్రత్యేక మండపాలను సిద్ధం చేసినట్లు తెలిపారు. ప్రభుత్వంలోని అన్ని శాఖల అధికారులతో సమన్వయం చేసుకుంటూ భక్తులకు మెరుగైన వసతులు, భద్రత కల్పిస్తున్నామని ఈవో అంజలీదేవి స్పష్టం చేశారు.