భ‌ర్త వివాహేతర సంబంధం తెగిపోవాలని భార్య పూజలు.. అడ్డుకున్న ఆలయ సిబ్బంది

హైదరాబాద్, జూన్ 23 (హైదరాబాద్ న్యూస్‌టైమ్): భర్తకు వేరే మహిళతో ఉన్న వివాహేతర సంబంధం తెగిపోవాలని కోరుకుంటూ, ఓ ఇల్లాలు హైదరాబాద్‌లోని సూర్యగిరి ఎల్లమ్మ ఆలయంలో వింత పూజలు చేసిన ఘటన స్థానికంగా కలకలం రేపింది. సదరు మహిళ ఆలయానికి చేరుకుని, తన భర్తతో పాటు ఆ మహిళ ఫోటోలను, పసుపు, కుంకుమ, మరియు ఒక తాడును వెంట తెచ్చుకుంది. అమ్మవారి సన్నిధిలో ఆ ఫొటోలను ఉంచి, క్షుద్ర పూజలను తలపించేలా వింతగా పూజలు చేయడం ప్రారంభించింది. అక్కడే ఉన్న భక్తులు ఒక్కసారిగా ఈ దృశ్యాన్ని చూసి కంగారుపడ్డారు. ఆమె చేస్తున్న పూజల పట్ల భక్తులు అసహనం వ్యక్తం చేస్తూ ఆలయ సిబ్బందికి ఫిర్యాదు చేశారు. వెంటనే అప్రమత్తమైన ఆలయ సిబ్బంది, ఆ మహిళను అడ్డుకుని, భక్తుల మనోభావాలను గౌరవించాలని సూచిస్తూ అక్కడి నుండి పంపించి వేశారు. ఈ ఘటన ఆలయం వద్ద కాసేపు గందరగోళానికి దారితీసింది.