మరణంలోనూ వీడని బంధం.. ఒకే దగ్గర అంత్యక్రియలు

హైదరాబాద్ న్యూస్ టైమ్ | మే 06, 2026

కడప: కడప జిల్లా చెన్నూరులో అత్యంత విషాదకర ఘటన చోటుచేసుకుంది. చిన్నపాటి మనస్పర్థలు రెండు నిండు ప్రాణాలను బలితీసుకున్నాయి. స్థానికంగా నివసించే యోగేంద్ర కుమార్ వర్మ(19), హేమశ్రీ(19) చిన్ననాటి నుండి స్నేహితులు. కడప నగరంలోని ఓ ప్రైవేట్ కాలేజీలో డిగ్రీ చదువుతున్న సమయంలో వీరి మధ్య ప్రేమ చిగురించింది. బాగా చదువుకుని, జీవితంలో స్థిరపడ్డాక పెద్దల అంగీకారంతో పెళ్లి చేసుకోవాలని ఈ జంట నిర్ణయించుకుంది. అయితే, గత కొద్దిరోజులుగా వీరిద్దరి మధ్య తలెత్తిన చిన్నపాటి మనస్పర్థలు ఊహించని విషాదానికి దారితీశాయి.

మనస్తాపానికి గురైన యోగేంద్ర కుమార్ వర్మ ఆదివారం రాత్రి ఉరేసుకొని ఆత్మహత్యకు పాల్పడ్డాడు. విషయం తెలుసుకున్న హేమశ్రీ.. తన ప్రియుడు లేని లోకంలో తాను ఉండలేనని తీవ్ర నిర్ణయం తీసుకుని ఆమె కూడా బలవన్మరణానికి పాల్పడింది. క్షణికావేశంలో ఈ జంట తీసుకున్న నిర్ణయంతో ఇరు కుటుంబాల్లో తీవ్ర విషాదం నిండింది. కలిసి జీవించలేకపోయినా, కనీసం మరణంలోనైనా వారిని విడదీయకూడదని భావించిన కుటుంబ సభ్యులు.. ఇరువురికి ఒకే చోట అంత్యక్రియలు నిర్వహించి కన్నీటి వీడ్కోలు పలికారు. చిన్న వయసులోనే జీవితం పట్ల అవగాహన లేక ఇలాంటి నిర్ణయాలు తీసుకోవద్దని స్థానికులు ఆవేదన వ్యక్తం చేస్తున్నారు.