మల్కాపురం ఐటీ పార్క్లో మహిళలు, చిన్నారుల భద్రతపై అవగాహన సదస్సు
చౌటుప్పల్, ఆగస్ట్ 13, 2026 (హైదరాబాద్ న్యూస్టైమ్): మహిళలు మరియు చిన్నారుల భద్రతను పెంపొందించే ఉద్దేశంతో యాదాద్రి భువనగిరి జిల్లా చౌటుప్పల్ పోలీస్ స్టేషన్ పరిధిలోని మల్కాపురం ఐటీ పార్క్లో ఉన్న 'తెలుగు పచ్చళ్ళు' కంపెనీలో ప్రత్యేక అవగాహన కార్యక్రమం నిర్వహించారు. చౌటుప్పల్ పోలీస్ స్టేషన్ ఇన్స్పెక్టర్ జి. మన్మధ కుమార్ ఆధ్వర్యంలో ఈ సదస్సు జరిగింది. ఈ కార్యక్రమంలో భాగంగా మహిళలు, చిన్నారులు దైనందిన జీవితంలో ఎదుర్కొనే వివిధ రకాల సమస్యలు, వేధింపులు, అత్యవసర పరిస్థితుల్లో తీసుకోవాల్సిన తక్షణ జాగ్రత్తలు, పోలీసులను సంప్రదించే విధానం తదితర కీలక అంశాలపై అవగాహన కల్పించారు. మహిళలు, చిన్నారుల రక్షణకు పోలీస్ శాఖ ఎల్లప్పుడూ అండగా ఉంటుందని, ఏదైనా ఇబ్బందికర పరిస్థితి ఎదురైనప్పుడు ఎలాంటి భయం లేకుండా వెంటనే పోలీసులను ఆశ్రయించాలని ఇన్స్పెక్టర్ జి. మన్మధ కుమార్ సూచించారు. సమాజంలో మహిళలు, పిల్లలపై జరిగే అఘాయిత్యాలను అరికట్టడంలో ప్రతి ఒక్కరూ బాధ్యతాయుతంగా వ్యవహరించాలని పిలుపునిచ్చారు. ఈ కార్యక్రమంలో సీడీఈడబ్ల్యూ (CDEW) కమిటీ సభ్యులు, పోలీస్ సిబ్బంది, కంపెనీ ఉద్యోగులు, మహిళలు తదితరులు పెద్ద సంఖ్యలో పాల్గొని భద్రతా నియమాలపై అవగాహన పొందారు.