మహిళా లెక్చరర్ వేధింపులతో ఇంటర్ విద్యార్థి ఆత్మహత్య

గద్వాల, జూలై 29, 2026 (హైదరాబాద్ న్యూస్‌టైమ్): జోగులాంబ గద్వాల జిల్లా ప్రభుత్వ కళాశాలలో ఇంటర్ సెకండ్ ఇయర్ చదువుతున్న కొత్తపల్లి గ్రామానికి చెందిన నేతిబొట్టు తరుణ్ (17) అనే విద్యార్థి బలవన్మరణానికి పాల్పడ్డాడు. లెక్చరర్ చేసిన అవమానం భరించలేక తరుణ్ ఆత్మహత్య చేసుకోవడం స్థానికంగా తీవ్ర కలకలం రేపింది.

ఘటన వివరాలు:

• గద్వాల ప్రభుత్వ కళాశాలలో చదువుతున్న తరుణ్.. ఇంటర్ ఫస్ట్ ఇయర్ ఫలితాల్లో 440 మార్కులకు గాను 434 మార్కులు సాధించి జిల్లాలో రెండో స్థానంలో నిలిచాడు.
• అయితే కాలేజీలో 435 మార్కులు వచ్చిన మరో విద్యార్థితో తరుణ్‌ను పోల్చిన ఓ మహిళా లెక్చరర్.. "434 మార్కులు వస్తే నువ్వేమన్నా గొప్పోడివా? నీకంటే ఎక్కువ మార్కులు వచ్చిన వారు కూడా ఉన్నారు" అంటూ అందరి ముందు కించపరిచింది.
• లెక్చరర్ మాటలను ఖండించిన తరుణ్.. అలా అందరి ముందు అవమానపరచడం సరికాదని విజ్ఞప్తి చేశాడు.
• దీనికి ఆగ్రహించిన లెక్చరర్.. "నువ్వేమైనా మంత్రి కొడుకువా, అంతకంటే గొప్పోడివా?" అంటూ తరుణ్ చెంపపై కొట్టి మరింతగా అవమానించింది.
• క్లాస్‌రూమ్‌లో అందరి ముందూ లెక్చరర్ తనను కొట్టి అవమానించడంతో పాటు తోటి విద్యార్థులు నవ్వడంతో తరుణ్ తీవ్ర మనస్తాపానికి గురయ్యాడు.

సూసైడ్ నోట్‌లో తరుణ్ ఆవేదన: మంగళవారం ఇంట్లో ఎవరూ లేని సమయంలో సూసైడ్ నోట్ రాసిన తరుణ్.. ఉరివేసుకుని ప్రాణాలు తీసుకున్నాడు. "ఉపాధ్యాయులు విద్యార్థులను ప్రోత్సహించే విధంగా ఉండాలి కానీ ఇలా అవమానించకూడదు. ఒక్క సున్నిత మనస్కుడికి అవమానం జరిగితే ఎంత బాధపడతాడో ఆ లెక్చరర్‌కు తెలియాలి" అంటూ తరుణ్ తన సూసైడ్ నోట్‌లో తీవ్ర ఆవేదన వ్యక్తం చేశాడు. తన చావుకు కారణమైన ఆ లెక్చరర్‌పై తగిన చర్యలు తీసుకోవాలని, ఈ నిజం అందరికీ తెలియాలనే తాను ఈ అడుగు వేస్తున్నట్లు ఆ లేఖలో పేర్కొన్నాడు.

ఈ ఘటనపై తోటి విద్యార్థులు, విద్యార్థి సంఘాలు తీవ్ర ఆగ్రహం వ్యక్తం చేస్తుండగా.. బాధ్యురాలైన లెక్చరర్‌పై తగిన చర్యలు తీసుకోవాలని డిమాండ్ చేస్తున్నారు. పోలీసులు కేసు నమోదు చేసి దర్యాప్తు చేపట్టారు.