హైదరాబాద్, జూన్ 26 (హైదరాబాద్ న్యూస్‌టైమ్): మ్యాట్రిమోనియల్ పరిచయాలు, ఇన్వెస్ట్‌మెంట్ల పేరుతో అమాయకులకు వల వేసి ఏకంగా రూ.1.46 కోట్లు కొల్లగొట్టిన అంతరాష్ట్ర సైబర్ క్రైమ్ ముఠా గుట్టును హైదరాబాద్ సైబర్ క్రైమ్ పోలీసులు రట్టు చేశారు. ఈ కేసుకు సంబంధించి తెలంగాణకు చెందిన నలుగురు నిందితులను అరెస్ట్ చేసి, వారి నుండి ఒక మొబైల్ ఫోన్‌ను స్వాధీనం చేసుకున్నారు.
మ్యాట్రిమోనీలో ‘మహిళ’గా నటిస్తూ వల: నిందితులు 'సంగం మ్యాట్రిమోనీ' వెబ్‌సైట్‌లో ఒక అందమైన మహిళ పేరుతో నకిలీ ప్రొఫైల్ సృష్టించి బాధితుడికి వల వేశారు. తానే ఆ మహిళనంటూ నమ్మిస్తూ, రోజువారీ చాటింగ్‌లతో అతనికి దగ్గరయ్యారు. పెళ్లి చేసుకుంటానని నమ్మకం కలిగించిన తర్వాత, ఒక నకిలీ ఇన్వెస్ట్‌మెంట్ ప్లాట్‌ఫామ్‌ను పరిచయం చేసి.. అందులో పెట్టుబడి పెడితే భారీ లాభాలు వస్తాయని ఆశ చూపించారు. పెళ్ళి చేసుకోబోయే అమ్మాయే కదా అని నమ్మిన బాధితుడు విడతల వారీగా ఏకంగా రూ.46.65 లక్షలు ఆ నకిలీ ప్లాట్‌ఫామ్‌లో ఇన్వెస్ట్ చేసి దారుణంగా మోసపోయాడు.
మ్యూల్ అకౌంట్లు టు సింగపూర్ హవాలా: పోలీసుల దర్యాప్తులో ఈ ముఠా వెనుక ఉన్న భారీ నెట్‌వర్క్ బయటపడింది. నిందితులు అమాయకుల పేరుతో తెరిచిన ‘మ్యూల్ బ్యాంక్ ఖాతాల’ (Mule Bank Accounts) ద్వారా ఈ సొమ్మును మళ్లించారు. ముఖ్యంగా తెలంగాణ, మహారాష్ట్రల్లోని ఇండియన్ ఓవర్సీస్ బ్యాంక్ ఖాతాల ద్వారా రూ.1.46 కోట్ల మేర భారీగా నగదు చేతులు మారినట్లు పోలీసులు గుర్తించారు. ఈ మోసపూరిత సొమ్మును స్థానిక నిందితులు హవాలా నెట్‌వర్క్ ద్వారా సింగపూర్‌కు చెందిన అంతర్జాతీయ సైబర్ ముఠాలకు చేరవేసినట్లు విచారణలో తేలింది.
అరెస్టయిన నిందితులు వీరే: ఈ అంతర్జాతీయ లింకులున్న సైబర్ వంచనకు సహకరించిన చొక్కాల సంపత్ (సిద్దిపేట), హెచ్చు నరేష్ (సికింద్రాబాద్), ఎండ్ల సురేష్ (సికింద్రాబాద్), మరియు వడ్కల మహేష్ (సికింద్రాబాద్)లను పోలీసులు అరెస్ట్ చేసి రిమాండ్‌కు తరలించారు. ఆన్‌లైన్ మ్యాట్రిమోనీ వేదికల్లో వచ్చే ఇలాంటి ఇన్వెస్ట్‌మెంట్ ఆఫర్లను నమ్మి మోసపోవద్దని పోలీసులు హెచ్చరిస్తున్నారు.