యాంటీవైరస్ ఆఫ్ అయ్యిందని విండోస్ 11లో అలర్ట్స్.. అదంతా ఫేక్ అన్న మైక్రోసాఫ్ట్

హైదరాబాద్, ఆగస్ట్ 30, 2026 (హైదరాబాద్ న్యూస్‌టైమ్): విండోస్ 11 (Windows 11) ఆపరేటింగ్ సిస్టమ్ ఉపయోగిస్తున్న యూజర్లను ప్రస్తుతం ఒక వింత నోటిఫికేషన్ తీవ్ర గందరగోళానికి గురిచేస్తోంది. కంప్యూటర్ ఆన్ చేసిన వెంటనే లేదా వాడుతున్న సమయంలో అకస్మాత్తుగా 'మైక్రోసాఫ్ట్ డిఫెండర్ యాంటీవైరస్ టర్న్డ్ ఆఫ్' (Microsoft Defender Antivirus is turned off) అంటూ తెరపై పాప్-అప్స్ వస్తుండటంతో.. తమ సిస్టమ్ భద్రతకు ఏమైనా ముప్పు వాటిల్లిందా అని యూజర్లు ఆందోళన వ్యక్తం చేస్తున్నారు. అయితే, ఈ సమస్యపై టెక్ దిగ్గజం మైక్రోసాఫ్ట్ క్లారిటీ ఇచ్చింది. ఇదొక టెక్నికల్ బగ్ (లోపం) మాత్రమేనని, దీన్ని చూసి యూజర్లు భయపడాల్సిన అవసరం లేదని స్పష్టం చేసింది. ఆగస్టు 28న విడుదల చేసిన విండోస్ 11 (వెర్షన్ 25H2) తాజా అప్‌డేట్‌లను ఇన్‌స్టాల్ చేసుకున్న తర్వాత ఈ తరహా ఫేక్ నోటిఫికేషన్స్ వస్తున్నట్లు సంస్థ గుర్తించింది. నోటిఫికేషన్ సెట్టింగ్స్ ఆఫ్ చేసినప్పటికీ ఇవి పదేపదే దర్శనమిస్తూ యూజర్లను విసిగిస్తున్నాయి.

యూజర్లు ఏం చేయాలంటే.. మీ కంప్యూటర్‌లో ఇలాంటి అలర్ట్ వస్తే ముందుగా మీ విండోస్ డిఫెండర్ సెట్టింగ్స్‌లోకి వెళ్లి యాంటీవైరస్ 'ఆన్'లో ఉందో లేదో సరిచూసుకోవాలి. సెట్టింగ్స్ అన్నీ యాక్టివ్‌గా ఉంటే.. ఈ నోటిఫికేషన్‌ను పూర్తిగా లైట్ తీసుకోవచ్చని మైక్రోసాఫ్ట్ సూచించింది. మీ కంప్యూటర్ భద్రతకు ఎలాంటి ఢోకా లేదని, యాంటీవైరస్ బ్యాక్‌గ్రౌండ్‌లో పర్‌ఫెక్ట్‌గా పనిచేస్తోందని సంస్థ భరోసా ఇచ్చింది. త్వరలోనే ఈ బగ్‌ను పరిష్కరిస్తూ ఓ ప్యాచ్ అప్‌డేట్‌ను తీసుకువస్తామని మైక్రోసాఫ్ట్ వెల్లడించింది.