హైదరాబాద్, జూన్ 27 (హైదరాబాద్ న్యూస్‌టైమ్): ప్రపంచంలోనే అత్యంత విలువైన ఆర్టిఫిషియల్ ఇంటెలిజెన్స్ (AI) ల్యాబ్స్, క్లాడ్ (Claude) ఏఐ సృష్టికర్త అయిన ‘యాంథ్రోపిక్’ (Anthropic) తమ విదేశీ ఉద్యోగులకు ఇస్తున్న జీతాల వివరాలు ఇప్పుడు ఇంటర్నెట్‌ను షేక్ చేస్తున్నాయి. అమెరికాకు చెందిన ఫెడరల్ హెచ్-1బీ (H-1B) వీసా ఫైలింగ్స్ ద్వారా లీకైన ఈ అధికారిక లెక్కల ప్రకారం.. యాంథ్రోపిక్‌లో పనిచేసే కీలక సాంకేతిక నిపుణుడికి ఏకంగా 1.38 మిలియన్ డాలర్లు, అంటే భారతీయ కరెన్సీలో దాదాపు రూ.13 కోట్ల వార్షిక బేస్ శాలరీ (Base Salary) ఇస్తున్నట్లు ‘బిజినెస్ ఇన్‌సైడర్’ నివేదిక వెల్లడించింది. బోనస్‌లు, కంపెనీ స్టాక్ ఆప్షన్లతో (ఈక్విటీ) సంబంధం లేకుండా కేవలం బేసిక్ పే రూపంలోనే ఈ రేంజ్ జీతాలు ఇవ్వడం టెక్ పరిశ్రమలో సంచలనంగా మారింది.
ఏఐ టాలెంట్ వార్.. ఏ పోస్టుకు ఎంతంటే? ఓపెన్ ఏఐ, గూగుల్, మెటా వంటి దిగ్గజ సంస్థల నుండి టాప్-టైర్ ఏఐ రీసెర్చర్లను, ఇంజనీర్లను తమ వైపు తిప్పుకునేందుకు యాంథ్రోపిక్ ఈ రేంజ్‌లో డబ్బులు కుమ్మరిస్తోంది. లీకైన ఫైలింగ్స్ ప్రకారం వివిధ విభాగాల జీతాల వివరాలు ఇలా ఉన్నాయి:
- మెంబర్ ఆఫ్ టెక్నికల్ స్టాఫ్: ఈ విభాగంలోని ఉద్యోగుల కనీస జీతం $1,34,000 (రూ.1.12 కోట్లు) నుండి గరిష్టంగా $1.38 మిలియన్ డాలర్ల (రూ.13 కోట్లు) వరకు ఉంది. మరో సీనియర్ ఉద్యోగి బేస్ పే $1.12 మిలియన్ డాలర్లుగా నమోదైంది.
- టెక్నికల్ మేనేజర్లు & రీసెర్చర్లు: రీఇన్‌ఫోర్స్‌మెంట్ లెర్నింగ్ రీసెర్చర్ల జీతాలు $1,13,000 నుండి $5,00,000 (రూ.4.1 కోట్లు) వరకు ఉండగా, టెక్నికల్ మేనేజర్ల జీతాలు గరిష్టంగా $8,50,000 (రూ.7 కోట్లు) దాటాయి.
- నాన్-టెక్నికల్ పోస్టులు: ప్రొడక్ట్ డిజైన్ మేనేజర్లకు $1,40,000 నుండి $3,85,000 వరకు, అలాగే అకౌంటింగ్, మార్కెటింగ్ సిబ్బందికి గరిష్టంగా $2,30,000 (రూ.1.9 కోట్లు) వరకు బేస్ పే అందుతోంది.
ప్రస్తుతం యాంథ్రోపిక్ మార్కెట్ విలువ దాదాపు 96.5 బిలియన్ డాలర్లకు చేరిన తరుణంలో.. ఈ శరవేగంగా ఎదుగుతున్న స్టార్టప్‌లో త్వరలోనే ఐపీఓ (IPO) వచ్చే అవకాశాలు కూడా కనిపిస్తున్నాయి. అమెరికాలో స్థానిక ఉద్యోగుల కొరత కారణంగా దాదాపు 80కి పైగా హెచ్-1బీ వీసాలను స్పాన్సర్ చేసి మరీ అంతర్జాతీయ టాలెంట్‌ను యాంథ్రోపిక్ ఎగరేసుకుపోతోందని మార్కెట్ విశ్లేషకులు చెప్తున్నారు.