ర‌ష్యా సైన్యంలో తెలుగు యువ‌కుల ఆర్త‌నాదాలు

హైదరాబాద్, సెప్టెంబర్ 30, 2026 (హైదరాబాద్ న్యూస్‌టైమ్): ఉపాధి కోసం రష్యాకు వెళ్లిన నలుగురు తెలంగాణ యువకులు అక్కడ మోసపోయి చిక్కుకున్నారు. సివిల్ ఉద్యోగాలు ఇప్పిస్తామని నమ్మించి కొందరు ఏజెంట్లు వారిని రష్యాకు తీసుకెళ్లగా, అక్కడ వారిని బలవంతంగా మిలిటరీ క్యాంపులో బంధించి సైనిక శిక్షణ ఇస్తున్నట్లు కుటుంబ సభ్యులు ఆరోపిస్తున్నారు. ఏ క్షణంలోనైనా వారిని రష్యా-ఉక్రెయిన్ యుద్ధ రంగానికి పంపే ప్రమాదం ఉందని వారు తీవ్ర ఆందోళన వ్యక్తం చేస్తున్నారు. బాధిత కుటుంబాల వివరాల ప్రకారం.. రవీందర్, అశోక్, ప్రకాశ్, అఫ్జల్ ఖాన్ అనే నలుగురు యువకులకు మంచి ఉద్యోగాలు వస్తాయని ఆశపడి రష్యాకు పయణమయ్యారు. కానీ అక్కడకు వెళ్లిన తర్వాత అసలు మోసం బయటపడింది. వారి పాస్‌పోర్టులు, పత్రాలను స్వాధీనం చేసుకుని రష్యా మిలిటరీ క్యాంపులో ఉంచారు. ప్రస్తుతం వారికి కఠినమైన సైనిక శిక్షణ ఇస్తున్నట్లు సమాచారం అందడంతో ఆ యువకుల కుటుంబ సభ్యులు దిగ్భ్రాంతికి గురయ్యారు. యుద్ధ రంగంలో ప్రాణాలు కోల్పోయే ప్రమాదం ఉందని, తమ బిడ్డలను సురక్షితంగా రక్షించి వెంటనే తెలంగాణకు రప్పించాలని వారి కుటుంబాలు ప్రభుత్వాలను వేడుకుంటున్నాయి. కేంద్ర, రాష్ట్ర ప్రభుత్వాలు తక్షణమే స్పందించి రష్యాలోని భారత రాయబార కార్యాలయం ద్వారా ఆ నలుగురు యువకులను కాపాడాలని వారు కన్నీరుమున్నీరవుతూ విజ్ఞప్తి చేస్తున్నారు.