రహదారికి అడ్డంగా ఉన్న చెట్లను తొలగించండి: సర్పంచ్ వసంత బాలు నాయక్

సంస్థాన్ నారాయణపురం, ఆగస్ట్ 31, 2026 (హైదరాబాద్ న్యూస్‌టైమ్): యాదాద్రి భువనగిరి జిల్లా సంస్థాన్ నారాయణపురం నుండి ఏనగండి తండా వరకు ఉన్న ప్రధాన రహదారికి ఇరువైపులా చెట్లు దట్టంగా పెరిగి ప్రయాణికులకు తీవ్ర అసౌకర్యం కలిగిస్తున్నాయని వెంకంబావితండా సర్పంచ్ పానుగోతు వసంత బాలు నాయక్ ఆవేదన వ్యక్తం చేశారు. రహదారికి అడ్డంగా పెరిగిన చెట్లను, అలాగే విద్యుత్ వైర్లకు తాకుతున్న కొమ్మలను వెంటనే తొలగించేందుకు అనుమతి మంజూరు చేయాలని ఆమె అధికారులను కోరారు. రహదారి వెంబడి పెరిగిన చెట్ల కొమ్మలు విద్యుత్ తీగలకు తగులుతుండటం వల్ల తరచుగా విద్యుత్ సరఫరాకు తీవ్ర అంతరాయం కలుగుతోందని, దీనివల్ల గ్రామ ప్రజలు తీవ్ర ఇబ్బందులు ఎదుర్కొంటున్నారని ఆమె తెలిపారు. అలాగే వాహనాల రాకపోకలకు కూడా ఈ చెట్లు అడ్డంకిగా మారాయని పేర్కొన్నారు. మరోవైపు, కొందరు వ్యక్తులు ఇష్టానుసారంగా రోడ్డు మధ్యలో పైప్‌లైన్ల కోసం తవ్వకాలు జరపడం వల్ల రోడ్లన్నీ గుంతలమయంగా మారుతున్నాయని సర్పంచ్ మండిపడ్డారు. ఈ గుంతల వల్ల ప్రయాణికులు, ద్విచక్ర వాహనదారులు నిత్యం ప్రమాదాల బారిన పడుతున్నారని ఆందోళన వ్యక్తం చేశారు. సంబంధిత అధికారులు తక్షణమే స్పందించి, ప్రయాణికులకు ఇబ్బందిగా మారిన చెట్లను తొలగించేందుకు అనుమతులు ఇవ్వాలని విజ్ఞప్తి చేశారు. అదేవిధంగా రోడ్డును ధ్వంసం చేస్తూ అడ్డంగా పైప్‌లైన్లు వేస్తున్న వారిని గుర్తించి కఠిన చర్యలు తీసుకోవాలని సర్పంచ్ వసంత బాలు నాయక్ డిమాండ్ చేశారు.