రాచకొండ రామాలయంలో దసరా ఉత్సవాల వాల్ పోస్టర్ ఆవిష్కరణ

సంస్థాన్ నారాయణపురం, యాదాద్రి భువనగిరి, అక్టోబర్ 4, 2026 (హైదరాబాద్ న్యూస్‌టైమ్): యాదాద్రి భువనగిరి జిల్లా సంస్థాన్ నారాయణపురం మండల పరిధిలోని చారిత్రక ప్రాధాన్యత కలిగిన రాచకొండ రామాలయంలో ఈఎల్‌వీ ఫౌండేషన్ చైర్మన్ భాస్కర్ ప్రత్యేక పూజలు నిర్వహించారు. ఈ సందర్భంగా రాచకొండ దసరా ఉత్సవాలకు సంబంధించిన అధికారిక వాల్ పోస్టర్‌‌ను ఘనంగా ఆవిష్కరించారు. ఈ కార్యక్రమంలో భాస్కర్ మాట్లాడుతూ.. దసరా శరన్నన‌వ‌రాత్రి వేడుకల్లో భాగంగా రాచకొండ రామాలయం వద్ద ప్రత్యేకంగా దుర్గామాత విగ్రహాన్ని ప్రతిష్ఠించనున్నట్లు తెలిపారు. పూజా కార్యక్రమాలు ముగిసిన అనంతరం నిమజ్జన కార్యక్రమాన్ని కూడా అక్కడే భక్తిశ్రద్ధలతో నిర్వహించనున్నట్లు వెల్లడించారు. మునుగోడు నియోజకవర్గంలోని చౌటుప్పల్, మర్రిగూడ, సంస్థాన్ నారాయణపురం, నాంపల్లి మరియు మునుగోడు తదితర అన్ని ప్రాంతాల్లోనూ దసరా ఉత్సవాలను అత్యంత వైభవంగా, సంప్రదాయబద్ధంగా నిర్వహించనున్నట్లు పేర్కొన్నారు. చారిత్రక రాచకొండ దేవాలయాన్ని మరింత అభివృద్ధి చేసి, ఆలయ ప్రాంగణాన్ని సర్వాంగసుందరంగా తీర్చిదిద్దడంతో పాటు భక్తులను ఆకర్షించేలా పర్యాటక కేంద్రంగా మార్చేందుకు తమ వంతు కృషి చేస్తామని ఆయన స్పష్టం చేశారు. ఈ ఉత్సవాల ఆవిష్కరణ కార్యక్రమంలో ఈఎల్‌వీ ఫౌండేషన్ సభ్యుడు అశోక్, అల్లాపురం సర్పంచ్ టేకుల మంజుల దిలీప్ రెడ్డి, రాచకొండ సర్పంచ్ జగన్, రాచకొండ రాజప్ప సమితి సభ్యులు బద్దుల కృష్ణ కుమార్, గూడూరు అంజిరెడ్డి, రిపోర్టర్ సింగం కృష్ణ, సంగిశెట్టి ధనుంజయ, బండమీద కిరణ్, శంకర్, శరత్, బాలకృష్ణ, ముత్యాలు, గంజి సునీల్, నాగరాజు రెడ్డితో పాటు ఫౌండేషన్ సభ్యులు, చుట్టుపక్కల గ్రామస్తులు, పెద్ద సంఖ్యలో భక్తులు, అభిమానులు పాల్గొన్నారు.