రెండు కుటుంబాలను కుదిపేసిన రోడ్డు ప్రమాదాలు.. వేర్వేరు ఘటనల్లో రెండు జంటల దుర్మరణం!

హైదరాబాద్, జూన్ 22 (హైదరాబాద్ న్యూస్‌టైమ్): రాష్ట్రంలో వేర్వేరు చోట్ల జరిగిన రెండు ఘోర రోడ్డు ప్రమాదాలు రెండు కుటుంబాలను శోకసంద్రంలో ముంచేశాయి. భద్రాద్రి కొత్తగూడెం జిల్లా కేంద్రంలోని వెంకటేశ్వర కాలనీకి చెందిన సాయిప్రకాశ్ (25) ఇటీవల తన తండ్రి మరణించడంతో.. తల్లి జ్యోతి, భార్య సంధ్య (22), చిన్న కుమారుడు మోక్షిత్ (2)లతో కలిసి ములకలపల్లిలోని బంధువుల ఇంటికి వెళ్లి వస్తుండగా మాధారం అటవీ ప్రాంతంలో కారు అదుపుతప్పి చెట్టును ఢీకొట్టింది. ఈ దుర్ఘటనలో సాయిప్రకాశ్ దంపతులతో పాటు పసివాడు మోక్షిత్ అక్కడికక్కడే మృతి చెందగా, తల్లి జ్యోతి తీవ్ర గాయాలతో ఆసుపత్రిలో ప్రాణాపాయ స్థితిలో చికిత్స పొందుతున్నారు. మరోవైపు, మంచిర్యాల జిల్లా కొండాపూర్‌కు చెందిన మహేందర్ (28).. ముంబైకి చెందిన దీక్షిత (25)ను ఎనిమిది నెలల క్రితం ప్రేమ వివాహం చేసుకోగా, వీరు హైదరాబాద్ నుండి ద్విచక్రవాహనంపై స్వగ్రామానికి వెళ్తుండగా సిద్దిపేట జిల్లా కుకునూరుపల్లి మండలం లకుడారం వద్ద ప్రమాదానికి గురయ్యారు. ముందు వెళ్తున్న ట్రాక్టర్ డ్రైవర్ ఒక్కసారిగా సడన్ బ్రేక్ వేయడంతో బైక్ బలంగా ఢీకొట్టింది. ఈ ఘటనలో ట్రాక్టర్ కేజ్ వీల్స్ తగిలి మహేందర్ అక్కడికక్కడే మృతి చెందగా, తీవ్రంగా గాయపడిన దీక్షిత ఆసుపత్రిలో చికిత్స పొందుతూ కన్నుమూసింది. ఎంతో భవిష్యత్తు ఉన్న రెండు యువజంటలు ఇలా రోడ్డు ప్రమాదాల్లో అర్ధాంతరంగా తనువు చాలించడం స్థానికులను తీవ్రంగా కలచివేసింది.