హైదరాబాద్, అక్టోబర్ 1, 2026 (హైదరాబాద్ న్యూస్‌టైమ్): సీఎం రేవంత్ రెడ్డి తీరుపై బీఆర్ఎస్ వర్కింగ్ ప్రెసిడెంట్ కేటీఆర్ తీవ్ర స్థాయిలో మండిపడ్డారు. రేవంత్ రెడ్డి నల్లమల పులి కాదని, చంద్రబాబు దగ్గరి పిల్లి అంటూ ఘాటు వ్యాఖ్యలు చేశారు. రాజన్న సిరిసిల్ల పర్యటన సందర్భంగా రేవంత్ రెడ్డి వ్యవహరించిన తీరును, ఆయన చేసిన వ్యాప్తులను కేటీఆర్ తీవ్రంగా తప్పుబట్టారు. సిరిసిల్ల పర్యటనపై కేటీఆర్ స్పందిస్తూ.. నాలుగు వేల మంది పోలీసులను వెంటేసుకుని సిరిసిల్లకు వెళ్లావని, నువ్వు నిజంగా పులివా రేవంత్ రెడ్డి అంటూ నిలదీశారు. ముఖ్యమంత్రి అయి మూడేళ్లు గడిచినా ఇంకా నీ ఫ్రస్టేషన్ ఏంటని ఆయన ఎద్దేవా చేశారు. రాష్ట్రంలో ప్రజా సమస్యలను గాలికొదిలేసి కేవలం రాజకీయ కక్ష సాధింపు చర్యలకే సీఎం పరిమితమయ్యారని విమర్శించారు.
కేటీఆర్ ప్రసంగంలోని ప్రధానాంశాలు:
- నేతన్నల సంక్షేమం గాలికి: తాము అధికారంలో ఉన్నప్పుడు నేతన్నలు ఎవరైనా ప్రమాదవశాత్తు చనిపోతే కుటుంబానికి ఆరు లక్షల రూపాయల బీమా అందేలా 'నేతన్నకు బీమా' పథకం తెచ్చామని, కానీ కాంగ్రెస్ హయాంలో ఆ పథకం పూర్తిగా నిలిచిపోయిందని ఆరోపించారు.
- బతుకమ్మ చీరల బంద్: ఆడబిడ్డలకు ఎంతో సంతోషాన్ని పంచే బతుకమ్మ చీరల పంపిణీని కూడా ప్రస్తుత ప్రభుత్వం నిలిపివేసిందని మండిపడ్డారు. ప్రజలకు ఉపయోగపడే వీటి గురించి ముఖ్యమంత్రి మాట్లాడతారని ఆశిస్తే, మళ్లీ పాత బూతు పురాణమే మొదలుపెట్టారని విమర్శించారు.
- దండయాత్రలా సిరిసిల్ల పర్యటన: రాష్ట్రంలో అభివృద్ధి పనులు పక్కనబెట్టి.. ఒక ముఖ్యమంత్రి, ఒక పీసీసీ అధ్యక్షుడు, ఆరుగురు మంత్రులు, ముప్పై మంది ఎమ్మెల్యేలు ఏదో పెద్ద దండయాత్రకు వెళ్లినట్లు సిరిసిల్లకు వెళ్లారని కేటీఆర్ ఎద్దేవా చేశారు.