రైతులకు ఇబ్బంది కలగకుండా చూడండి: ఎమ్మెల్యే కోమటిరెడ్డి రాజ్ గోపాల్ రెడ్డి

మునుగోడు, జూలై 29, 2026 (హైదరాబాద్ న్యూస్‌టైమ్): ఎల్ నినో ప్రభావంతో ఈసారి వర్షాలు తక్కువగా కురిసే అవకాశం ఉందని, దీనివల్ల మునుగోడు నియోజకవర్గంలో పూర్తిగా బోరుబావులపైనే ఆధారపడిన వ్యవసాయానికి ఎలాంటి ఇబ్బంది కలగకుండా నిరంతరం విద్యుత్ అందించాలని ఎమ్మెల్యే కోమటిరెడ్డి రాజ్ గోపాల్ రెడ్డి విద్యుత్ శాఖ అధికారులను ఆదేశించారు. మునుగోడులోని క్యాంపు కార్యాలయంలో యాదాద్రి భువనగిరి, నల్గొండ జిల్లాల విద్యుత్ శాఖ అధికారులతో ఆయన నియోజకవర్గ స్థాయి సమీక్ష సమావేశం నిర్వహించారు. కరెంటు అనేది ప్రజల జీవనంలో భాగమని, మునుగోడును విద్యుత్‌లో రోల్ మోడల్‌గా తీర్చిదిద్దేందుకు ప్రణాళికాబద్ధంగా అడుగులు వేయాలని సూచించారు.

• అభివృద్ధి ప్రణాళికలు: ముందుగా అన్ని మండల కేంద్రాల్లో గృహాలపై ఉన్న విద్యుత్ తీగలను షిఫ్ట్ చేసి సమస్యలు లేకుండా చూడాలని, ఆ తర్వాత గ్రామాల్లోని సమస్యలు, విడతల వారీగా వ్యవసాయ బావుల లైన్లను అభివృద్ధి చేసేలా అంచనాలు రూపొందించాలని కోరారు. పనులు చేసే బాధ్యత అధికారులదని, నిధులు తెచ్చే బాధ్యత తాను చూసుకుంటానని స్పష్టం చేశారు.
• ఏఈ నరేందర్ పరామర్శ: ఇటీవల పని ఒత్తిడి, వేధింపుల వల్ల ఆసుపత్రిపాలైన మునుగోడు మండల ఏఈ నరేందర్‌కు ఫోన్ చేసి పరామర్శించారు. డిపార్ట్‌మెంట్‌లో ఏం జరుగుతుందో పైస్థాయి అధికారులు చూసుకోవాలని మందలించిన ఆయన, నరేందర్‌కు ధైర్యం చెప్పి తాను అండగా ఉంటానని భరోసానిచ్చారు.
• సబ్ స్టేషన్ల పనులపై సీఎండీతో చర్చ: వర్షాభావ పరిస్థితుల దృష్ట్యా బోరుబావులపై విపరీతమైన భారం పడి లో వోల్టేజ్ సమస్య తలెత్తే అవకాశం ఉందని, మంజూరైన సబ్ స్టేషన్ల నిర్మాణాలను వేగవంతం చేయాలని ట్రాన్స్కో సీఎండీ కృష్ణ భాస్కర్‌కు ఫోన్ చేసి కోరారు. నియోజకవర్గంలో ప్రస్తుతం 31 సబ్ స్టేషన్లు పనిచేస్తుండగా.. కొత్తగా 6 అందుబాటులోకి వచ్చాయని, మరో 3 ప్రారంభానికి సిద్ధంగా ఉన్నాయని, ఇంకో 6 టెండర్ దశలో, మరో 3 భూమి కేటాయింపు దశలో ఉన్నాయని సమీక్షించారు. వీటిని త్వరగా పూర్తి చేసి నాణ్యమైన కరెంటు అందించాలని ఆదేశించారు.

ఈ సమావేశంలో యాదాద్రి భువనగిరి జిల్లా ఎస్‌ఈ సురేష్, నల్గొండ కన్స్ట్రక్షన్ డీఈ నరసింహ, దేవరకొండ డీఈ బాల్య నాయక్, నల్గొండ డీఈ విద్యాసాగర్, చౌటుప్పల్ డీఈ మల్లికార్జున్, వివిధ మండలాల ఏడీఈలు, ఏఈలు మరియు నియోజకవర్గ ముఖ్య నాయకులు పాల్గొన్నారు.