లోన్ యాప్ నిర్వాహకుల అరాచకం.. కూతురి ఫోటోలు మార్ఫ్ చేసి తల్లిని బెదిరిస్తున్న కేటుగాళ్లు

హైదరాబాద్, సెప్టెంబర్ 9, 2026 (హైదరాబాద్ న్యూస్‌టైమ్): నగరంలో లోన్ యాప్ నిర్వాహకుల అరాచకాలు రోజురోజుకూ మితిమీరిపోతున్నాయి. అప్పు చెల్లించలేదన్న కోపంతో ఓ మహిళ పట్ల అత్యంత దారుణంగా ప్రవర్తించి, ఆమె పదవ తరగతి చదువుతున్న కూతురి ఫోటోలను మార్ఫ్ చేసి బ్లాక్‌మెయిల్‌కు దిగిన ఘటన కలకలం రేపింది. బోడుప్పల్ ప్రాంతానికి చెందిన ఓ మహిళ తన బంధువు కోసం 'వర్ధన్' (Vardhan) లోన్ యాప్ ద్వారా రుణం తీసుకుంది. అయితే, గత కొన్ని రోజులుగా ఈఎంఐ చెల్లించకపోవడంతో లోన్ యాప్ రికవరీ ఏజెంట్లు ఆమెకు ఫోన్ చేసి తీవ్రస్థాయిలో వేధించడం మొదలుపెట్టారు. ఆమె వారి నెంబర్లను బ్లాక్ చేయడంతో మరింత రెచ్చిపోయిన కేటుగాళ్లు, ఆమె 10వ తరగతి చదువుతున్న కూతురి ఫోటోలను అసభ్యకరంగా మార్ఫ్ చేసి ఆమెకు పంపించారు. వెంటనే అప్పు చెల్లించకపోతే ఆ ఫోటోలను సోషల్ మీడియాలో వైరల్ చేస్తామంటూ తీవ్రంగా బెదిరింపులకు పాల్పడ్డారు. ఈ దారుణ బెదిరింపులతో తీవ్ర మనోవేదనకు గురైన బాధితురాలు, లోన్ యాప్ నిర్వాహకుల ఆగడాలపై పోలీసులను ఆశ్రయించి ఫిర్యాదు చేశారు. కేసు నమోదు చేసుకున్న పోలీసులు దర్యాప్తు చేస్తున్నారు.