విశాఖపట్నంలో భారీ గోల్డ్ స్మగ్లింగ్ భగ్నం..

విశాఖపట్నం, అక్టోబర్ 11, 2026 (హైదరాబాద్ న్యూస్‌టైమ్): ఆంధ్రప్రదేశ్‌లోని విశాఖపట్నంలో డైరెక్టరేట్ ఆఫ్ రెవెన్యూ ఇంటెలిజెన్స్ (DRI) అధికారులు భారీ ఎత్తున విదేశీ బంగారాన్ని స్వాధీనం చేసుకున్నారు. కోల్‌కతా నుంచి హైదరాబాద్‌కు కారులో తరలిస్తున్న రూ. 8.98 కోట్ల విలువైన విదేశీ బంగారాన్ని పట్టుకుని, ఇద్దరు వ్యక్తులను అరెస్ట్ చేసినట్లు అధికారులు వెల్లడించారు. ఖచ్చితమైన నిఘా సమాచారం మేరకు డీఆర్ఐ అధికారులు జాతీయ రహదారిపై నిఘా పెట్టి, సుదీర్ఘ వెంబడింపు తర్వాత అనుమానాస్పద వాహనాన్ని అడ్డగించారు. కారులో సోదాలు నిర్వహించగా.. ముందు సీటు పక్కన కాళ్లు పెట్టుకునే స్థలంలో (కో-ప్యాసింజర్ సీటు కింద) ప్రత్యేకంగా అమర్చిన రహస్య అర (cavity) బయటపడింది. ఆ సీక్రెట్ క్యావిటీ నుంచి 24 క్యారెట్ల స్వచ్ఛత కలిగిన 5,832.90 గ్రాముల (5.83 కేజీలు) విదేశీ బంగారాన్ని అధికారులు స్వాధీనం చేసుకున్నారు. మార్కెట్ ధర ప్రకారం దీని విలువ రూ. 8.98 కోట్లు ఉంటుందని అంచనా వేశారు. ఈ బంగారాన్ని భారత్-బంగ్లాదేశ్ సరిహద్దుల గుండా అక్రమంగా దేశంలోకి రవాణా చేసి, అక్కడి నుంచి హైదరాబాద్‌కు తరలిస్తున్నట్లు ప్రాథమిక విచారణలో తేలింది. కస్టమ్స్ చట్టం-1962 (Customs Act, 1962) ప్రకారం బంగారాన్ని స్వాధీనం చేసుకున్న అధికారులు.. నిందితుడిని, మరొకరిని అదుపులోకి తీసుకుని మేజిస్ట్రేట్ ఎదుట హాజరుపరిచారు. కోర్టు వారికి జ్యుడీషియల్ కస్టడీ విధించగా, ఈ స్మగ్లింగ్ రాకెట్‌కు సంబంధించి మరింత లోతుగా దర్యాప్తు జరుపుతున్నారు.