వైభవ్ సూర్యవంశీపై ఒత్తిడి పెట్టకండి: సౌరవ్ గంగూలీ

హైదరాబాద్ న్యూస్‌టైమ్, జూన్ 08, 2026: భారత యువ క్రికెట్ సంచలనం వైభవ్ సూర్యవంశీ ఆటతీరు, అతడిపై పెరుగుతున్న అంచనాలపై టీమిండియా మాజీ కెప్టెన్ సౌరవ్ గంగూలీ ఆసక్తికర వ్యాఖ్యలు చేశారు. ముంబైలో జరిగిన ఒక కార్యక్రమంలో గంగూలీ మాట్లాడుతూ.. "ప్రస్తుతం వైభవ్‌కు కేవలం 15 ఏళ్లు మాత్రమే, అతడిని ఒత్తిడికి గురిచేయకుండా ప్రశాంతంగా వదిలేయాలి" అని సూచించారు. ఐపీఎల్‌లో అతడి అద్భుతమైన ప్రదర్శనను మనం చూశామని, అయితే దేశం తరఫున ఆడేటప్పుడు ఉండే ఒత్తిడి పూర్తిగా భిన్నంగా ఉంటుందని గంగూలీ పేర్కొన్నారు. ఈ వయసులోనే అతడు ఒత్తిడి గురించి ఎక్కువగా ఆలోచిస్తాడని తాను అనుకోవడం లేదని, యువ ఆటగాడికి తగిన సమయం ఇవ్వడం ముఖ్యం అని 'దాదా' స్పష్టం చేశారు. ఐపీఎల్ వేలంలో రికార్డు సృష్టించి అందరి దృష్టిని ఆకర్షించిన వైభవ్ సూర్యవంశీ భవిష్యత్తుపై మాజీలంతా భారీ అంచనాలు పెట్టుకున్న తరుణంలో గంగూలీ చేసిన ఈ వ్యాఖ్యలు ప్రాధాన్యత సంతరించుకున్నాయి.