సాయికృష్ణ లాకప్డెత్లో ఊహించని మలుపు.. ఏకంగా కమిషనర్పైనే కోర్టులో సంచలన పిటిషన్!
హైదరాబాద్, జూన్ 27 (హైదరాబాద్ న్యూస్టైమ్): సాయికృష్ణ అనుమానాస్పద లాకప్డెత్ వ్యవహారంలో బాధితుడి తల్లి విజయలక్ష్మి హైకోర్టు వేదికగా సంచలన న్యాయపోరాటానికి దిగారు. ఈ కేసును తక్షణమే సీబీఐ (CBI) కి అప్పగించడంతో పాటు, ఆ దర్యాప్తును హైకోర్టు స్వయంగా పర్యవేక్షించాలంటూ ఆమె తాజాగా కోర్టులో అనుబంధ పిటిషన్ దాఖలు చేశారు. ఈ సందర్భంగా స్థానిక పోలీస్ కమిషనర్తో పాటు ఉన్నతాధికారుల తీరుపై ఆమె చేసిన ఆరోపణలు పోలీస్ శాఖలో తీవ్ర కలకలం రేపుతున్నాయి. సోమవారం ఈ పిటిషన్పై హైకోర్టు ధర్మాసనం విచారణ జరపనుంది.
సాయికృష్ణ లేడని తెలిసినా 40 రోజులు మౌనం – సీపీపై ఆరోపణలు: "నా కుమారుడి అదృశ్యం వెనుక అసలు నిజాలు పోలీస్ కమిషనర్కు ముందే తెలుసు. నా కొడుకు బతికి లేడనే చేదు నిజం తెలిసినా ఆయన ఏకంగా 40 రోజుల పాటు మౌనంగా ఉండిపోయారు. నేను ఫిర్యాదు చేసిన 45 రోజుల తర్వాత గానీ పోలీసులు కేసు నమోదు చేయలేదు. దీన్ని బట్టే ఈ అదృశ్యం, లాకప్డెత్ వెనుక పోలీస్ కమిషనరేట్ పరిధిలోని ఉన్నతాధికారుల ప్రమేయం ఎంత ఉందో స్పష్టమవుతోంది" అని విజయలక్ష్మి తన పిటిషన్లో పేర్కొన్నారు.
హెబియస్ కార్పస్ క్లోజ్ చేయించేందుకే ఈ ‘సిట్’ నాటకాలు: ప్రస్తుతం రాష్ట్ర ప్రభుత్వం నియమించిన సిట్ (SIT) దర్యాప్తు కేవలం కంటితుడుపు చర్య మాత్రమేనని ఆమె మండిపడ్డారు. ఈ కేసులో కేవలం నాగరాజు అనే వ్యక్తిని అరెస్ట్ చేసి చేతులు దులుపుకున్నారని, పోలీసుల అసలు కుట్రను ఛేదించడంలో సిట్ ఘోరంగా విఫలమైందని ఆరోపించారు. తాము ఏదో పెద్ద దర్యాప్తు చేస్తున్నట్లు హైకోర్టును నమ్మించి, తాను దాఖలు చేసిన ‘హెబియస్ కార్పస్’ (కొడుకును కోర్టు ముందు ప్రవేశపెట్టాలనే) పిటిషన్ను ఎలాగైనా క్లోజ్ చేయించాలన్నదే పోలీసుల ముఖ్య ఉద్దేశమని విజయలక్ష్మి పిటిషన్లో బట్టబయలు చేశారు. అసలు దోషులను శాశ్వతంగా తప్పించి, ఈ లాకప్డెత్ ఉదంతాన్ని ఎప్పటికీ వెలుగులోకి రాకుండా అణచివేయాలని చూస్తున్నారని, ఈ అసాధారణ పరిస్థితుల్లో హైకోర్టు జోక్యం చేసుకుని తగిన ఆదేశాలు ఇవ్వాలని ఆమె ధర్మాసనానికి విజ్ఞప్తి చేశారు.