సిమ్ కార్డుల జారీపై కేంద్ర ప్రభుత్వం కీలక ఆంక్షలు

న్యూఢిల్లీ, ఆగస్ట్ 21, 2026 (హైదరాబాద్ న్యూస్‌టైమ్): మోసపూరిత కాల్స్, సైబర్ నేరాలను అరికట్టేందుకు కేంద్ర ప్రభుత్వం కీలక నిర్ణయం తీసుకుంది. ఇకపై ఎవరి దగ్గరైనా ఇప్పటికే 9 లేదా అంతకంటే ఎక్కువ సిమ్ కార్డులు ఉంటే, వారికి కొత్తగా సిమ్ కార్డులను జారీ చేయవద్దని టెలికాం సంస్థలకు కేంద్ర టెలికాం శాఖ స్పష్టమైన ఆదేశాలు జారీ చేసింది. సైబర్ మోసగాళ్లు సిమ్ కార్డులను దుర్వినియోగం చేస్తున్నారనే ఆరోపణల నేపథ్యంలో ఈ నిర్ణయం తీసుకున్నట్లు తెలుస్తోంది. ఒకే వ్యక్తి పేరిట ఎక్కువ సిమ్ కార్డులు ఉండటం వల్ల నేరస్థులు సులభంగా గుర్తింపును దాచిపెట్టి మోసాలకు పాల్పడుతున్నారు. ఈ నేపథ్యంలో భద్రతా పరమైన చర్యల్లో భాగంగా, టెలికాం సంస్థలన్నీ తమ డేటాబేస్‌ను సరిచూసుకోవాలని, 9 కంటే ఎక్కువ కనెక్షన్లు ఉన్న వినియోగదారులకు కొత్త సిమ్ కార్డుల జారీని వెంటనే నిలిపివేయాలని కేంద్రం సూచించింది. ఈ నిబంధన ద్వారా అక్రమంగా సిమ్ కార్డులను పొంది, వాటిని నేరాలకు వాడుతున్న ముఠాలకు చెక్ పడనుంది. ఇప్పటికే ఉన్న కనెక్షన్ల విషయంలో కూడా ప్రభుత్వం నిరంతరం పర్యవేక్షణ చేపడుతుందని, అనుమానాస్పదంగా ఉన్న సిమ్ కార్డులను గుర్తించి నిబంధనల ప్రకారం చర్యలు తీసుకుంటామని సంబంధిత అధికారులు పేర్కొన్నారు.