సుమంత్ కిడ్నాప్ కేసులో రూ. 1.10 కోట్లు స్వాధీనం.. ముగ్గురు అరెస్ట్

తిరుపతి, సెప్టెంబర్ 14, 2026 (హైదరాబాద్ న్యూస్‌టైమ్): తిరుపతి రూరల్ పోలీస్ స్టేషన్ పరిధిలో సంచలనం సృష్టించిన సుమంత్ కిడ్నాప్ కేసుకు సంబంధించి పోలీసులు భారీ మొత్తంలో నగదును స్వాధీనం చేసుకున్నారు. చంద్రగిరి మండలం నాగపట్నం గ్రామానికి చెందిన సుమంత్ "నాని క్రికెట్ ప్రిడిక్షన్" పేరుతో టెలిగ్రామ్ ఛానెల్ నిర్వహిస్తున్నాడు. ఈ క్రమంలో ఆ టెలిగ్రామ్ ఛానెల్‌ను నార్త్ ఇండియాకు చెందిన వ్యక్తికి సుమంత్ రూ. 6 కోట్లకు విక్రయించాడు. సుమంత్ దగ్గర కోట్ల రూపాయలు ఉన్నట్లు తెలుసుకున్న అతని స్నేహితులే అతన్ని కిడ్నాప్ చేయాలని పథకం పన్నారు. ఈ నేపథ్యంలో సుమంత్‌ను ఆయన స్నేహితులు కిడ్నాప్ చేశారు. అయితే కిడ్నాపర్ల చెర నుంచి ఓ స్నేహితురాలి సహాయంతో సుమంత్ తప్పించుకోగలిగాడు. బాధితుడు ఆగస్టు 28న తిరుపతి రూరల్ పోలీసులకు ఫిర్యాదు చేయడంతో ఈ ఘటన వెలుగులోకి వచ్చింది. రంగంలోకి దిగిన పోలీసులు ఈ కిడ్నాప్ కేసులో ముగ్గురు నిందితులను అరెస్ట్ చేశారు. నిందితుల్లో ఒకరైన చందు ఇంటి వద్ద, తాటితోపు ప్రాంతంలో దాచిపెట్టిన రూ. కోటి 10 లక్షల నగదును స్వాధీనం చేసుకున్నారు. ఈ కిడ్నాప్‌నకు ప్రధాన సూత్రధారులుగా ఉన్న యశ్వంత్, మనోజ్, గౌతంల కోసం పోలీసులు గాలింపు చర్యలు ముమ్మరం చేశారు.