స్నేహితుడు వండిన భోజనం తిని.. మృత్యువు అంచున యువతి!

క్యాన్సర్ వంటి మహమ్మారిని జయించిన ఆ యువతిని, స్నేహితులతో కలిసి తిన్న ఒక విందు భోజనం మృత్యువు అంచున నిలబెట్టింది. అమెరికాలోని అరిజోనాలో జరిగిన ఈ వింత ఘటన ఇప్పుడు ప్రపంచవ్యాప్తంగా చర్చనీయాంశమైంది.

ఏం జరిగిందంటే?

24 ఏళ్ల ట్రినిటీ పీటర్సన్-మేయెస్ గత నెలలో తన స్నేహితులతో కలిసి విందులో పాల్గొన్నారు. అక్కడ 'ఫెర్మెంటెడ్ స్వోర్డ్ ఫిష్' (పులియబెట్టిన చేప) అనే వంటకాన్ని రుచి చూశారు. అది తిన్న 24 గంటల్లోనే ఆమె పరిస్థితి విషమించింది. నీళ్లు తాగాలన్నా మింగలేక, కనీసం మాట్లాడలేక, కదలలేక తీవ్ర అస్వస్థతకు గురయ్యారు.

అరుదైన వ్యాధి 'బోటులిజం' (Botulism):

ఆసుపత్రిలో పరీక్షించగా ఆమెకు 'బోటులిజం' అనే అత్యంత అరుదైన, ప్రాణాంతక వ్యాధి సోకినట్లు వైద్యులు గుర్తించారు. ఇది బ్యాక్టీరియా ద్వారా విడుదలయ్యే శక్తివంతమైన విషతుల్య పదార్థం (Toxin). ఇది నేరుగా శరీరంలోని నాడీ వ్యవస్థపై దాడి చేస్తుంది. దీనివల్ల:

కండరాలు పక్షవాతానికి గురవుతాయి.

శ్వాస తీసుకోవడం కష్టమవుతుంది.

సకాలంలో చికిత్స అందకపోతే మరణం సంభవిస్తుంది.

మృత్యువుతో పోరాటం:

ట్రినిటీ పరిస్థితి ఎంత దారుణంగా తయారైందంటే, ఆమె తన సొంత లాలాజలాన్ని కూడా మింగలేకపోయారు. ముఖ కండరాలు బలహీనపడి, శ్వాస తీసుకోవడం ఆగిపోవడంతో ఆమెను వెెంటిలేటర్‌పై ఉంచి చికిత్స అందించారు. ప్రాణాలను రక్షించే 'యాంటీ టాక్సిన్' మందులను అందించడంతో ప్రస్తుతం ఆమె నెమ్మదిగా కోలుకుంటున్నారు. ఆ విందులో పాల్గొన్న మరో ఇద్దరు స్నేహితులకు కూడా ఈ వ్యాధి సోకినట్లు తేలింది.

జాగ్రత్త పడాల్సిన ఆహార పదార్థాలు:

సాధారణంగా ఆక్సిజన్ లేని, తక్కువ ఆమ్ల గుణం ఉన్న పరిస్థితుల్లో ఈ బ్యాక్టీరియా విషాన్ని విడుదల చేస్తుంది. ముఖ్యంగా:

నిల్వ ఉంచిన చేపలు: సరిగ్గా ప్రాసెస్ చేయని సీఫుడ్ వల్ల ప్రమాదం ఎక్కువ.

డబ్బాల్లో నిల్వ చేసిన ఆహారం (Canned Food): ఇంట్లో తయారుచేసే క్యాన్డ్ ఫుడ్స్ పట్ల జాగ్రత్తగా ఉండాలి.

బయట పడేయాల్సినవి: లీక్ అవుతున్న లేదా ఉబ్బినట్లు ఉన్న టిన్ ఫుడ్స్ వాడకూడదు.

వెల్లుల్లి & ఆయిల్: నూనెలో నిల్వ ఉంచిన వెల్లుల్లి మిశ్రమాలను గది ఉష్ణోగ్రత వద్ద ఎక్కువ కాలం ఉంచితే ప్రమాదం.

"మళ్లీ చేపలు గానీ, సుషీ గానీ తినాలంటేనే భయమేస్తోంది" అని ట్రినిటీ తన చేదు అనుభవాన్ని పంచుకున్నారు. ఆమె కోలుకోవడానికి ఇంకా కొన్ని నెలల సమయం పడుతుందని వైద్యులు చెబుతున్నారు.